Wimbledon 2015 Djokovic-a ropuina a zual zel

Novak Djokovic chuan Roger Federer hnehin a vawi thum nan Wimbledon champion nomawi a chawi. A nomawi humhim turin world number 1 Djokovic chuan Pathianni zan khan world number 2 Federer chu Centre Court-ah 7-6, 6-7, 6-4, 6-3 in a hneh.

Vawi sarih a lo champion tawhna Wimbledon-ah hian Swiss chhuanvawr Federer-a'n champion hnem ber record siam turin vawi khat chak bak a mamawh tawh lo a, mah se darkar hnih leh minute 56 chhungin Serbian superstar Novak lakah a tlawm a ni.

Kum 28-a upa Dokovic hi Wimbledon-ah vawi thum a champion-na chiah a nih bakah Grand Slam tournament-a vawi kua a champion-na a ni a, Jimmy Connors, Andre Agassi leh Ivan Lendl te record a tluk chiah. Ani aia champion tamte chu Roger Federer, Pete Sampras, Rafael Nadal leh Bjorn Borg te chauh an ni ta.

Kuminah Djokovic hi a khel ṭha tluang hle a, match 51 a khel tawh aṭangin vawi thum chiah chak loh a la nei. Kumina Grand Slam hmasa ber Australian Open-ah a champion bawk. Federer leh Nadal te vanglaia rawn chawrchhuak a nih avangin Grand Slam chawi hnem tawk lo mah se tunah chuan a thiamna hi tuman an upbeh sak thei ta lo.

May thla khan French Open final-ah Stan Wawrinka a hneh loh avangin Pathianni zan Wimbledon final-ah Djokovic a khel fimkhur takzet a, a chesual duh mang lo. Inkhelh chhung zawngin vawi 16 chauh un­forced error a nei a, Federer erawhin vawi 35 zet unforced error a nei thung. Set khatnaah vawi khat ve ve service an inchhuhsak hnuin tie break-ah Djokovic a dingchang.

Set hnihnaah Djokovic bawk che ṭha lehin set point vawi sarih ngawt a hmu a, mah se huaisen taka bei lettu Federer-a'n set a la let thung. Set thumna an khelh laiin ruah sur vangin minute 22 chhung inkhel an chawl. An rawn let leh hnuah Djokovic-a'n a khingpui tan hun ṭha a siam sak tawh lo.

Kum 33-a upa Federer chuan, "Chak turin hun ṭha chu ka nei ve ngei mai, mahse hun pawimawhah kei aiin Novak kha a chet ṭhat zawk ṭhin avangin ani khan chak a phu zawk. Ka khel chhe hran lo a, mahse ka khelh ṭhat ber ni chu a ni lo chiang. Novak kha a rilru puthmang a dikin a huaisen a, tun chauh lo pawh hi ala champion zel ka ring; champion zel tur pawhin ka duhsak e," tiin a sawi.

World number 2 Federer hi khawvela mipa tennis player piang tawh zinga Grand Slam champion hnem ber niin vawi 17 zet a champion tawh a ni.

Kum 28-a upa Djokovic chuan, "Federer nena inkhelh ringawt pawh hi ka tan chuan a hluin chawimawina a ni tawh. Hnehna ka chang phei hi chu ka lawmna hi thuin a sawifiah zo lo zawk hial. Ani hi chu player dangte pawhin kan ngaihsan leh kan entawn a ni," a ti.

Hnehna a chan hnua grass (phaitual hnim) a ei chung­chang zawhna chhangin Djokovic chuan, "Ka naupan lai aṭangin Wimbledon a champion hi ka duhthusam a ni ṭhin. Kan duhthusam a thleng a nih chuan thil atthlak deuh anga lang hi tih a châkawm ṭhin a, chutiang chu a ni ber ang chu," tiin a chhang. Kum 2001 leh 2014-a a champion ṭum pawh khan grass hi a lo ei tawh a ni.

Ngaihnawm:-

*Final hmazawng khan Federer-a'n a service vawi khat chiah a hloh a, mah se final-ah erawh vawi li lai a hloh thung.

*Best-of-five set match-ah Djokovic hian set hmasa ber la chungin vawi khat chiah chak loh a la nei a, vawi 164 a chak tawh thung.

*Champion turin Djokovic hian point kua a zawnin a hmu thei a ni.

*A chak chiah khan Djokovic kha Grand Slam-ah vawi 200 a chakna chiah niin ani aia chak hnem mi paruk chiah an awm. Pete Sampras tluk turin vawi thum chak chiah a mamawh tawh.

* Tun hnai Grand Slam hnuhnung 11-a Andy Murray hnehtu mi pakua ngawt chu an match leh hmasa berah an chak lo zel. Federer hian semifinal-ah Murray a hneh.