MotoGP Marquez a inlar leh ṭan ta

MotoGP world champion lai Repsol Honda rider Marc Marquez chu Germany rama tlan zawh tak GoPro Motorrad Grand Prix-ah pakhatna a ni. He hmunah hian nikum khan hnehna lo chang tawh bawkin a zawnin vawi ruk hnehna a chang ta.

Pathiannia intlansiakah Spanish rider hi a tlan ṭha hle a, a hnungah hian Dani Pedrosa leh Valentino Rossi te an thleng a, a zawna vawi li hnehna chang zawn thei Jorge Lorenzo-a'n beisei phak loin palinaah a thleng thung.

Season hmasa khan Marquez hian intlansiak vawi 18 awm aṭangin vawi 13 hnehna changin a champion chiang hle. Kuminah erawh intlansiak vawi kua hmachhawn tawhin vawi hnih hnehna a channa chiah a la ni; April thla khan Austin-ah hnehna a lo chang tawh.

Sachsenring tlankawngah hian Repsol Honda rider pahnih Marquez leh Pedrosa te hian bike ke hmaah 'Hard Tyre' an hmanga , an tisual lo chiang hle. Intlansiak bul ṭan ṭha Lorenzo chu lap thumna lekah Marquez hian tlanpel nghalin a tawp thlengin hma a hruai.

Kum 22-a upa Marquez chuan, "Chet chhiat a kaltluan laklawh hi chuan beiseina hi a bo hman ṭep ṭhin. Mahse tunah chuan kei leh kan team-in kawng dik kan zawh leh ta. Karleh hian Misano-ah Bike enchhinna kan nei leh dawn a, hmasawnna hmuh tur a awm ngei ka ring. Intlansiak tur ala tam avangin beidawn ala hun lo e," tiin beiseina ala nei sang hle.

Hnehna chang mah se Marquez hi rider championship lamah chuan palina ala ni pha chauh a; point 114 hmuin hmahruaitu Rossi nen chuan point 65 zetin an la inthlau mek a ni.