United player thar ber Schneiderlin

Southampton midfielder Morgan Schneiderlin-a'n pound maktaduai 25 chuang hretin Manchester United a zawm ang. Kum 25-a upa midfielder hian kum li chhung cham turin United-ah hian contract a ziak a, a ṭul dan a zirin a contract hi kum khat dang pawhsei theih a ni ang.

United leh Saints te hian Pathianni khan inremna an nei a, kum 25-a upa French midfielder hi US Tour-ah an hruai tel beisei a ni.

Hetihlai hian Germany captain Bastian Schweinsteiger chuan kum thum chhung cham turin Old Trafford-ah contract a ziak bawk a, a man zat hi pound maktaduai 14.4 a ni.

Nizan khan United-in England chhuahsanin America an pan a, Louis Van Gaal hote hian Club America (17 July) leh MLS club San Jose Earthquakes (21 July) bakah European club lian Barcelona (25 July) leh Paris Saint-Germain (29 July) te an hmachhawn dawn.

Louis van Gaal-a'n season thar atan PSV forward Memphis Depay, Torino defender Matteo Darmian leh Bayern Munich midfielder Bastian Schweinsteiger te a la lut tawh. French midfielder Schneiderlin hi United player thar palina a ni a, a tawpna tur a ni lo.

United hian nikum khan pound maktaduai 150 chuang hret an hmang a, kumin hian hetiang zat vel bawk hi hmang turin an sawi a, tuna an player lakluh tawh aṭanga an hman tawh zat chu pound maktaduai 80 bawr vel a ni.

Southampton hian kar liamta khan Manchester United-in pound maktaduai 20-a Schneiderlin lei an tumna chu an hnawl a, ṭum hnihna erawh an hnar phal lo.

Tottenham Hotspurs pawhin lak tuma an veh Schneiderlin hian rilru leh taksa lama a inpeih loh avangin nikum nipui khan Southampton pre-season training a zawm lo a, club chunga a lungawi loh chhan hi Arsenal-in lei an tumna club hotuten an hnawl vang a ni. Amaherawhchu French midfielder hian ṭha takin a khel chhunzawm tho a, Premeir League-ah Saints tan vawi 25 khelin pasarihna dinhmun a hauh pui bawk.

Schneiderlin hian kum 2008 khan Strasbourg aṭangin Southampton hi pound maktaduai 1.2 in a zawm a, Saints tan hian League One, Championship leh Premier League-ah te a khel vek tawh.

French midfielder hi Premier League match tinah vawi 52.9 pass dik nei ang zel a ni a, second 95 dana pass dik vawi khat ang zel nei niin amah aia pass hnem pariat chiah an awm. Champions League finalist leh Copa America-a Chile champion puitu Arturo Vidal-a'n (41.3) a tluk lo.

Schneiderlin pass dik percentage hi 89% a ni a, Juventus midfielder pound maktaduai 60 man bawr vela an sawi Paul Pogba (84%) aiin a ṭha zawk. United midfielder thar hian nikum khan match tinah tackle hlawhtling vawi 3.04 zel a nei a, Chelsea midfielder Nemanja Matic (2.81) aiin a record a nei ṭha zawk. French midfielder hian pass interception (khingpuite in pass tur dah sak) pawh match tinah vawi 2.42 zel a nei a, Europe-a midfielder ṭha ber pawla sawi Sergio Busquets (1.52) aiin a record a chhuanawm zawk.

Amaherawhchu Schneiderlin hian tawnhriat a la ngah tawk lo, club tan European competition a la khel ngai lo. France tan vawi kua chiah a la inlan a, 2014 FIFA World Cup-ah khan coach Didier Deschamps-a'n United midfielder thar hi stand by-ah a dah a, squad-ah a tel pha lo.