Iker Casillas-a nuin ngaihdam a dil

Real Madrid captain chhuak ta Iker Casillas-a nu chuan a fapa club thar tur FC Porto chungchanga a ṭawngkam vangin ngaihdam a dil.

Casillas-a nu Mari Carmen Fernandez hian a fapa chuan Porto aia ṭha zawk club-a khelh a phu thu leh Portuguese club chu thrid tier club ang lek a nih thu a lo sawi tawh a ni.

Kum 34-a upa Spa­nish keeper Casillas-a nu chuan, "Ka fapa chung­changah ka lo ṭawngsual palh a ni. Ka fapa an lakluh duh avangin Porto chungah lawmthu ka sawi a, he club hlawhtlin nan hian ṭha taka an thawhho theih ka beisei a ni. Ka thusawi avang khan ngaihdam ka dil. Madrid-a a hlawhtlin ang chiahin ka fapa hi he hmunah hian a hlawhtlin theih ka beisei a ni," a ti.

Real fan te'n Casillas-a lakah a phu tawk ang zahna an lan tir lo nia an sawi chungchang chhangletin Mari chuan, "Kum riat mi lek niin he hmunah hian trial a nei a, he club tan hian a theihna zawng zawng pein zahawm takin a hun a hmang. Ka ngaihdan chuan Real fan ten ka fapa hi an thlawp ṭha em em a, a inkhel vawi tam tak ka thlir naah pawh ka fapa ṭana an au rual dual dual lai hi ka hmu fo a ni," tiin Real fan-te a sawi chhe duh lo.

Hetihlai hian Casi­llas-a chhungte chuan an fapa chhuah chhanah Real Madrid president Florentino Perez an dem hle thung. Casillas-a nu Mari Carmen chuan, "He club aṭanga Casillas chhuah tir tur hian kum 2010 aṭang khan Perez hian hma a lo la tawh a, ka fapa hian a tuar rei tawh em em a ni," tiin Perez chu a fapa tihchhiat tumah a puh.

Casillas-a pa Jose Luis pawh ṭawngchhuakin, "Ṭawngkam ṭha lo leh dengkhawng tak tak hmangin ka fapa hian beih a tawk reng a, ka fapa hi tihchhiata tluksawp tir an duh a ni," tiin Real hotute a dem hle.

Real Madrid-a cham chhunga Champions Lea­gue nomawi ringawt pawh vawi thum ngawt chawi tu Casillas-a chhungte hian Perez chu Casillas chu ama player lakluh a nih loh vang mai duhsak loah an puh bawk a ni.