Schweini tel lohna Bayern midfield
Bayern Munich manager Pep Guardiola-a'n ngaihtuah chiang loin thutlukna a siam lo ang. Germany captain Bastian Schweinsteiger-a'n Bundesliga champion chhuahsana, UEFA Champions League khel pha thei tur Manchester United a zawm chhan hi Spanish manager-in a mamawh tawk loh vang a ni.
Bayern midfield Schweini aiawh thei tur player pariat thlir la, 2015-16 season-a UEFA Champions League champion thei turin an ṭha tawk.
Hruaitu ṭha - Lahm
Captain Philipp Lahm hi full back ṭha bik a ni a, palian lo mah se player fing tak a nih avangin Pep Guardiola-a'n kum 2013-a Bayern a enkawl aṭangin defensive midfield hna a chelh fo a, a rintlak.
Central midfielder dang ang thoin (3744 minutes) khelhna hmun a hmu tam a, kum 31-a upa hian pass (3245) a ngah ber a, pass dik loh pawh 9.6% chauh a nei. Chawhrualin minute 90 chhungin 11.3 kilometres a tlan pha a, player thawkrim tak a ni.
Player ṭangkai - Alaba
Austrian international David Alaba hi Lahm nen hian an inang khawp mai. Left back ṭha bik a ni a, defence laia player pathum hman a ṭul chuan ṭha takin a khel thei a; kum 23-a upa Alaba hi defensive midfield-ah A Grade a ni pha hrim hrim. 2014/15 season tawp lamah Bayern-in a tel lo an tuar hle.
Chuai thei lo - Alonso
Alaba-a'n DFB Cup leh UEFA Champions League aṭanga an tlak ṭum a khelh theih loh laiin Xabi Alonso erawh Guardiola hman theih turin a dam ṭha. Spanish veteran midfielder hian match khatah ball vawi 138.5 te a khawih pha hial a, Bayern player zingah tluk pha an awm lo. Ball chan tam kawngah Liverpool leh Real Madrid midfielder hlui hi a ṭangkai a, sawiselna tur erawh a rang tawk lo tih chauh a ni.
La Masia chhuak - Alcantara
Inhliam vanga nih tura ang ni pha lo Thiago Alcantara hi Manchester United-in lakluh ngial an tum a, mah se Barca lama a pu hlui Pep Guardiola hnuaia khelh a thlang zawk.
Kum 24-a upa Alcantara hi season hnih chhungin Bundesliga-ah vawi 23 chiah a inlan a, a khelh chhunah erawh ball pass a thiam zia a lang a, field chhung a thlir thui zia a lang ṭhin. A dam ṭhat chuan Pep-a hnuaiah hmun pawimawh a chang ang.
Spanish pathumna - Martinez
Bayern-in Spanish midfield pathum an kawl a, Javi Martinez hi dah hniam bik theih a ni lo. 2012/13 season-a Bayern an treble champion ṭumin midfielder pawimawh a ni a, Guardiola hnuaiah central defender a ni. Martinez hian ball a chuhin 65.7% a chuh hneh a, boruaka ball inchuhnaah 76.3% ah a chak bawk. A khelhna position tur chu Spanish manager thutlukna a ni.
Player thawkrim - Rode
Kum 24-a upa Sebastian Rode hi ram leh club-a Schweini thlak thei tura beisei a ni a, German mipui innghahna a ni. Feet ruk leh inches 10-a sang Rode hi a chak ṭha a, ball pass a thiam bawk avangin Guardiola duhzawng tak a ni. Nikum khan Bundesliga-ah match 23 a khel a, UCL-ah vawi sarih a khel bawk. Tun season-ah hmun tam zawk a chan beisei a ni.
Talent nei ṭha - Hojbjerg
Danish international Pierre-Emile Hojbjerg hi feet ruk leh inches khat zeta sang a ni a, kum 19 chauha upa a la ni bawk. 2014/15 season chawhnu lamah FC Augsburg-ah khelhna hmun tam zawk beiseiin a chhuak a, UEFA Europa League khel thei dinhmunah a hruai thleng. Hojbjerg hian club danga a tawnhriatte tun season-ah hman ṭangkai a tum ang.
Mi thar - Kimmich
Hojbjerg ang thoin Bayern player thar Joshua Kimmich hian hmabak eng tak a nei. Kum 20-a upa Kimmich hian nikum khan Bundesliga-2 club RB Leipzig tan league match 27 khelin goal hnih a khung. Germany U19 leh U21 tan tackling a neih ṭhat zia a lantir tawh a, Bayern tana khel pha tur chuan a la hriam tawk kher lo ang.