India-in Zimbabwe-ah ODI series an la

Zimbabwe-ah India cricket team an zin chhuak a, ODI series match thum khelh tur awmah vawi hnih inkhel tawhin an star player engemaw zat tel loa kal India-in series an la fel der.

India hian an player pawimawh MS Dhoni, Virat Kohli leh senior player engemaw zat chu chawlh hahdamna hun an pek vangin Zimbabwe-ah hian an hruai lo. India tana hun rei tak chhung inkhel tawh lo Harbhajan Singh chu squad-ah hian koh let a ni a, Ajinkya Rahane chu captain-ah hman a ni.

Zirtawpni khan ODI series hi khelh ṭan niin match hma­sa berah India-in run liin a thlengtu Zimbabwe an hneh hram.

Pathianniah match khat khelh leh a ni a, India tak tak kan hmu ta thung. Bat hmasa zawk India tan opener Ajinkya Rahane leh Murali Vijay te an che ropui a, India an chakpui. MS Dhoni hahchawlh vanga captain Rahane hian ball 83 a hmachhawnah run 63 a vawchhuak a, kum 27-a upa batsman hian captain mawhphurhna a hlen zo hle.

Rahane hi a opener pui Murali Vijay-a'n a thlawp ṭha bawk a, rei tak hnua India squad-a koh kir Murali hian ball 95-ah run 72 vawchhuakin dinhmun duhawm takah India an hlangkai.

India hian over 50-ah run 271 vawchhuakin mi pariat chiah an hloh a ni.

Zimbabwe bat hun a thleng a, mual neitu Zimbabwe batsman-te aia langsar zawk chu Indian bowler-te an ni. India tan fast bowler Bhuvneshwar Kumar a lo lang a, Zimbabwe batsman-ten an ngam lo hle. Kum 25-a upa Bhuvneshwar hian over 10-a vawmah run 33 chauh pein wicket li lai a la.

Over 49 thleng bak Zimba­bwe-in an tlin lo a, run 209 vaw­chhuakin an vaiin an out vek.

India-in ODI series match thum khelh tura match hnihah hnehna an chan tak avangin series an la chiang a, match thumna hi vawiinah an khel leh ang.