Sherwood-a'n Delph rinawmna a fak

Aston Villa manager Time Sherwood chuan an captain Fabian Delph-a'n Manchester City sawmna a hnar chu ropui a tih thu a sawi.

Season hman zawh taka Villa player ṭangkai ber pawl Delph hi Manchester City chuan lakluh tumin an dawr a, mah se Inrinni khan Delph hian Villa Park-ah a cham chhunzawm zel tur thu a sawi a ni.

Season tawp lama ropui taka Villa kaihruaitu Sherwood chuan, "He hmun­ah hian team ṭha tak din kan tum a, chumi atan chuan kan player ṭha leh pawimawhte chelh zel hi kan tum. Delph hi chutiang entirna ṭha tak chu a ni. He club tana a rinawm­na hi a ropui em em a ni," tiin a captain chu a fak hle.

Sherwood chuan Por­tugal-a club training Delph-a'n a zawm ve loh chhan sawi nghalin, "Vawiina kan zinga a tel ve loh chhan chu a nupui rai vang a ni a, a nupui hi nau nei thei mai dinhmunah a ding reng a ni. Fabian hi hruaitu ṭha leh team kaihhruai thiam em em mai a ni a, ani hi nei lo ila chu Premier League-ah hian kan awm tawh kher lo maithei a ni," a ti.

Tottenham boss hlui chuan Delph-a'n Villa Park-a cham chhunzawm zel a thlan avangin an club chhungkua chu an lawm takzet thu a sawi bawk.