CONCACAF Gold Cup - Mexico chak zo lo

CONCACAF Gold Cup group match hmasa berah Mexico chuanCuba 6-0 ngawtin sawp mah se an game hnihnaah Guatemala lakah goal an khung lo.

Phoenix Stadium-a inkhelah hian Guatemala player Jose Manuel Contreras chu hnawhchhuah ni mah se manager Miguel Herrera enkawl Mexico team hian minute 90 chhungin goal an khung thei lo a ni.

Gold Cup vawi ruk champion tawh Mexico hian match hnih an khelh tawh aṭangin point li hmuin group C-ah pahnihna dinhmun an luah a, quarterfinal khel turin an in pet tling.

Group C inkhel dangah Pa­thian­ni khan group hmahruaitu ni turin Trinidad and Tobago chuan Sheldon Bateau leh Andre Bou­caud gaol khung hmangin Cuba chu 2-0 in an hneh.

Trinidad and Tobago hian an match hmasaah Guatemala chu 3-1 a hneh tawh bawk avangin point ruk an hmu a, quarterfinal an lut chiang.