New Zealand-in OFC hremna khinglet dawn

Olympic qualifying-a player chhawr theih loh an chhawr nia puh vanga paihchhuah ni ta New Zealand chuan an chunga Oceania Football Confederation (OCF) thutlukna chu khinlet an tum thu an sawi.

New Zealand hian Olympic qualifying semi final-ah Vanuatu chu 2-0 in an hneh a, mah se Vanuatu hian New Zealand hian player chhawr theih loh South Africa lam chhuak Deklan Wynne an chhawr nia sawiin OCF lamah an zualko a, thiam changin 3-0 a chak zawkah puan an ni. Pathianni khan final khelh a ni a, Vanuatu hian penalty-ah Fiji hneh loin champion team hian 2016 Rio Olympic-ah Oceania ai an awh dawn.

Kum 20-a upa Wynne hian thla hmasa FIFA under-20 World Cup-ah khan New Zealand tan a khel a, New Zealand khua leh tui nihna pek a nih hnuin New Zealand senior team-ah a khel leh bawk a ni. Hetihlai hian OCF disciplinary committee hian Wynne chuan FIFA dan aṭanga chhutin New Zealand tana khelh theihna pakhatmah a nei lo niin an sawi.

OFC-in an tarlan dan chuan New Zealand-a piang pawh ni lo leh New Zealand lam chhuak nu leh pa emaw pi leh pu pawh nei lo Wynne hian New Zealand tana khel tur chuan kum 18 a tlin aṭanga kum nga tal New Zealand-ah hian a khawsak a ngai a ni.

New Zealand Football hruaitute chuan an buaina chu FIFA lamah an thlen tawh thu sawiin thiam an chan ngei an rin thu an sawi bawk.