Hello Bayern - Chelsea an lo zin ania!

Premier League-a Brentford nena inhnehtawk hlim Chelsea chu zanin dar 12:30 hian Champions League-ah an inlan lehnghal dawn a, an hmachhawn tur chu Bayern Munich a ni!

Blues hian Allianz Arena-ah German champion hi an hmachhawn dawn a, kartawpah league match khel turin Manchester United chu Old Trafford-ah an lenchilh zui dawn - Enzo Maresca tan 'pressure' a sang khawp ang.

London club hian league match li an khelh tawhah vawi hnih hnehna changin, vawi hnih an khingpui an inhnehtawkpui a, Blues hmaa club lian la enkawl ngai lo Enzo-a'n sawiselna a tawk ṭan - boruak sang a ngam leh ngam loh zaninah a hriat dawn.

EPL a pawimawh

Maresca-a'n Bayern an hmachhawn tur a ngaihtuah tih hriat takin, Marc Cucurella, Reece James leh Malo Gusto te chu bench lamah a dah vek a, mahse, Cucurella leh James te chu a mangan hnu lamah a luhtir leh tho!

Mahse, Italian coach hian Bayern ngaihtuah vanga thutlukna siam a nih loh thu a sawi ve tlat! Maresca chuan, "EPL-a kan tih ṭhat avanga Champions League khel thei kan ni a, chuvangin EPL khelh zanah UCL ka ngaihtuah lo.

"Joao Pedro kha 100% in a fit lo a, Bayern ringawt ngaihtuah ni ila, ka khelhtir lo ang," a ti - Blues hian nipui transfer-ah player an lei nual chungin Liam Delap a inhliam leh si a, Pedro tih loh tlarhmaah striker rin tlak an nei meuh lo.

Fimkhur a ngai

Bayern hian tun season-ah league match thum khel tawhin, vawi thum an chak a, goal 14 ngawt an khung tawh - Brentford laka tlarhnung pherh Chelsea tan fimkhur a ṭul dawn.

Harry Kane hian tun season-ah goal riat a khung leh der tawh a, Luis Diaz leh Michael Olise ten match nga ve ve khelh tawhah goal li an khung tawh bawk - Serge Gnabry a awm bawk a, he team hi mahni muala Chelsea hneh turin an ṭha tawk.

Lam hmaih theih hauh loh chu, Blues-in Delap aia an duh loh zawk Nicolas Jackson a ni. Senegalese striker hian loan-in Bayern a pan a, bul a ṭan la rinawm chiah lo mah se, bench aṭang erawhin lut thei reng a ni.

Chak a ṭul

Chelsea tan Bayern laka hnehna chang turin Cole Palmer chet ṭhat a ṭul a, English attacking midfielder hian a theihna sang bera a khelh chhuah phawt chuan German club tan mangchhia thlen theitu a ni ang.

London club tan chak a ṭul lehzual - Barcelona leh Napoli chu an la hmachhawn tur zingah an tel a, Benfica, Ajax leh Atalanta te an la awm bawk avangin an tan league phase paltlang loh mai a hlauhthawnawm hle.

Bayern hian Paris Saint-Germain leh Arsenal an la hmachhawn ve dawn tho a, mahni muala Chelsea ngam loh ngawt hi mualphona a tling dawn - Vincent Kompany a fimkhur khawp ang.