PSG tan Kvaratskhelia inlan thei mai thei

Season hmasa treble champion Paris Saint-Germain chu hliam vangin an talbuai a, an coach Luis Enrique thlengin an inhliam - Spanish coach hi cycle khalhna lamah a chesual a, ban awrh chungin a team erawh a enkawl tho.

Hetiang a nih lai hian kartawp inkhelah khan hliam vangin Khvicha Kvaratskhelia chu lakchhuah a ngai a, Ousmane Dembele leh Desire Doue te hliam vanga an chawlh sa bawk avangin fan-te an hlauthawng hman hle.

Mahse, nimin khan PSG-in chanchin lawmawm an nei a, Kvaratskhelia-a'n mimalin training a nei leh tawh - zaninah inkhel bul a ṭan nghal thei lo a nih pawhin, bench aṭanga lut thei tur talin a awm dawn niin French media-te chuan an tarlang.

European champion PSG hian zanin dar 12:30-ah Italian club Atalanta chu tun season-a an UCL match hmasa berah an hmachhawn dawn a, Barcelona, Bayern Munich, Tottenham Hotspur leh Newcastle United la hmachhawn tur club tan tlawm a thiang lo.

PSG hian kartawp inkhelah khan RC Lens chu 2-0 in an hneh a, Kvaratskhelia bakah Lee Kang-In pawh hliam vanga lakchhuah niin, South Korean midfielder hian team training a zawm tawh bawk.

Paris club hian Dembele leh Doue te chu international break-ah hliam vangin an chân a, France national team laka an lungawi loh thu an lo puang hial tawh a ni.