A sang pali zingah MLS; a mawngphahah SYS

GIG Motors MPL12-ah MLS FC chuan nimin khan SYS FC chu 1-0 in an hneh a, relegation zone aṭangin a sang pali zingah an inhlangkai. MPL league round-ah hian vawi hnih an inkhel chhuak ṭhin a, vawi khat inkhelh kual zawhah Lawngtlai club hi a sang paliah an awm a, Saikhamakawn aiin head to head-ah an ṭha zawk. Palinaa an awm avang hian Vanlalpeka hote hian semifinal luh beiseina sang tak an neih phah ang.

RG Stadium inkhela goal awmchhun hi Falton N. Beirachakhei khung a ni a, MLS tan goal hlu bik a ni. SYS erawh match sarih aṭangin point khat chiah an hmu a, an kum a naupan deuh hret bawk avangin relegation zone chhuahsan a harsa ang.

A goal lo

MLS leh SYS ten chak tumin an khel a, goal chance hmuh tur awm bawk mah se goal hmuh tur erawh a awm mai lo. Lawngtlai club-in Ricky H. Vanlalhriatsanga, Freddy Lalrinkima leh K. Lalremmuana te hmangin chance nei mah se SYS lamin goal khungna chance an nei ṭha zawk.

Halfway line aṭanga H. Lalhumhima (Pepe) vawrhluh chu Lawngtlai keeper Lalvanlawma'n a hnek sual a, Oliver Lalmalsawma Khiangte zawnah a tla. Hnahthial rawlthar Oliver tan goal ruak tih theih a ni a, a pet nat tawk loh avangin MLS defender Laldinsanga'n a tauh chhuak hman.

MLS pawhin goal khungna remchang an nei leh tho a, Kanan laka goal hnih khungtu Freddy-a'n hnai tak aṭangin SYS goalkeeper Bawihpuia zawnah a pet. First half-ah team pahnih an inhnehtawk a, goal hmuh tur a awm lo.

Goal 100-na

Second half ṭantirhah Falton luhtir a ni a, Serkawr tlangval hi danglamna thlentu a ni. Minute 54-naah Ricky corner pet chu Freddy-a'n box chhungah tidingin Falton-a'n rang takin goal-ah a pet a, SYS tlarhnung dem chi a ni lo a, MLS set piece a mawi takzet.

Falton-a goal hi MPL12-a goal 100-na chiah a ni a, season liam ta kha league round-a goal luh tam ber niin goal 206 a lut. Kuminah phase 2 khelh tur a la awm a, season chawhnu lamah club an inthlah dul a nih loh chuan record thar hi siam theih a ni.

SYS hian point khat chiah an la hmu a, MPL season khata point hmu tlem ber record siam thei dinhmunah an ding mek bawk. MPL3-ah Lunglei FC-in point li chauh hmuin record duhawm lo tak an siam a, SYS hian record thar siam hi an duh lo ang.

MPL12 phase 2 hi September 18, Ninganiah khelh chhunzawm a ni lehnghal dawn a, phase 2 aṭangin zanah khelh ṭan a ni dawn. Inkhel hmasa zawk hi tlai dar 3:00-ah khelh a ni ang a, a hnuhnung zawk hi zan dar 7:00-a khelh tura ruahman a ni.