Hong Kong lakah Sri Lanka vannei

Asia Cup-ah Pathianni zan khan Sri Lanka-in Hong Kong an hneh a, nuam saa chak tura ngaih ni mah se Lions hian hnehna chang turin vanneihna an mamawh. Sri Lanka hi wicket liin an chak a, ball sarih chiah an dah bang a ni.

Dubai International Stadium-a inkhelah Sri Lanka-in vawm hmasak an thlang a, Hong Kong-in 149/2 runs an siam. Lions tan target harsa niin a lang lo a, opener Pathuum Nissanka (68) a che ṭha bawk. Mahse, over 16-naah Nissanka a run out a, Kusal Parera (20) a out zui lehnghal. Captain Charith Asalanka-a'n run hnih chauh a siam a, Kamindu Mendis-a'n run nga lek a siam.

Chak lo thei dinhmunah Sri Lanka an ding tawh a, mahse Hong Kong bowler Perera-a'n free hit a pe a, Wanindu Hasaranga-a'n six a vuaksak. Sri Lanka dinhmun a rawn ṭha chho lehnghal a, Hasaranga (20*) hian four vawi li dang vaw chhuakin Lions a chakpui.

Group B-ah nizan khan Afghanistan leh Bangladesh te an inkhel a, Afghanistan an chak a nih chuan Super Four lut tur a chiang dawn. Mahse, Bangladesh an chak erawh chuan September 18, Ningani zana Afghanistan leh Sri Lanka inkhel a hmuhnawm sawt ang.

Group A lamah UAE-in (172/5) Super Four beiseina nei turin Oman (130) chu 42 runs-in an hneh. Inelna thlengtu hian zanin dar 8:00 hian Pakistan an hneh thei a nih chuan Super Four an lut dawn. India-in September 19, Zirtawpni zanah Oman an hmachhawn dawn a, Pakistan leh UAE an sawp tawh avangin Super Four an lut tawh thung.