Serie A-ah Vardy a inlan

Jamie Vardy chuan Thawhṭanni zan khan Serie A match hmasa ber a khel ve ta a, a club thar Cremonese tana a inlanna hmasa berah hian goal erawh a khung lo, an khingpui Hellas Verona nen 0-0 in an inhnehtawk.

A vanglai chuan Vardy hi English striker hriam leh hlauhawm berte zinga mi a ni ṭhin. Leicester City tan Premier League leh FA Cup nomawi a la a, tunah erawh kum 38 mi ni tawhin a vanglai a liam ve tawh thung.

Vardy hian nipui bazar tawp ni khan Cremonese hi a zawm a, tun ṭumah hian a tir aṭangin a la lut nghal mai bik lo. Minute 58-naah Federico Bonazzoli thlakin khelmualah a lut a, danglamna siam nghal erawh a harsa ve bawk a ni.

A tawp lamah Venron-in an nawr na viau a, mahse season bul ṭan fuh Cremonese an ṭang tlang thei - match thum aṭanga point sarih hmuin pathumna dinhmun an luah a, an khingpui Verona erawh table mawngphah lamah an cham chhunzawm thung.

Davide Nicola-a enkawl Cremonese hian kartawpah Parma an hmachhawn zui leh ang. Parma hian point khat chauh an la hmu a, an chet ṭhat tawk loh avangin Vardy leh a ṭhiante tan point hmuh belh theihna remchang a nih a rinawm.

Thawhṭanni zan inkhel dangah Genoa leh Como te chu 1-1 in an inhnehtawk ve bawk. Como tan rawlthar duhawm Nico Paz-a goal khung chu Genoa lamin hun tawp hma chiahin Caleb Ekuban hmangin an sut a, goal dang a lut hman tawh lo.

Cesc Fabregas leh a nauten hun tawp dawnah an vanduai, minute 88-naah an defender Jacobo Ramon chu hnawh chhuah a ni a, a hnuah goal an chhuah zui bawk, point li hmu tawhin pakuanaah an awm mek.

Genoa hi Arsenal captain hlui Patrick Vieira enkawl an ni thung a, tun season Serie A match vawi thum an khelh tawh chinah chak ni hmel an la hmu lo, point hmuh chauh an la hlawh chhuak - inhamtan chhunzawm chu an tum tur a nih hmel nghal hle a ni.