Umtiti-a'n inkhelh a chawlhsan

France international defender hlui Samuel Umtiti chuan inkhelh a chawlhsan a, hliamin a tlakbuak deuh reng avangin a duh aia hmain a chawlh a ngai ta ni pawhin a lang.

Kum 31 mi Umtiti hi a vanglai chuan defender ṭha tak niin Barcelona leh Lyon tan a khel a, season hmasa pawh khan Ligue 1 club Lille tan a la khel bawk, tunah erawh a ballboot a khai ve ta.

Umtiti chuan, "Zinkawng nuam leh hlimawm tak a ni a, lungngai taka indawm kun chang ka nei bawk. Tunah chuan mangṭha tih ka sawi a lo hun ve ta, football tan ka theihna leh thiamna zawng zawng ka hlan a, khang hunah khan ka inchhir lo," a ti.

A pianna tak chu Cameroon a ni a, a naupan laiin France ramah an pem avangin ram tan pawh a inlan chhunzawm ta zawk. Kum 2016 khan Umtiti hian Barcelona a pan a, Spanish club tan hian kum sarih hun a hman chhungin La Liga nomawi pahnih leh Copa del Rey title pathum a lakpui hman.

Ram tan pawh hlawhtlinna lian a chang - 2018 World Cup an champion theih nan a thawh hlawk hle a, semifinal-a Belgium an hnehna goal awmchhun chu a khung a ni hial, goal venhim bakah a khung lamah hna a thawk tihna a ni.

France tana 2018 World Cup champion player an chawl tam ta hle - Umtiti hma hian Raphael Varane, Blaise Matuidi, Adil Rami leh Steve Mandanda te chuan inkhelh an lo chawlhsan tawh bawk.

Umtiti hian nikum January khan Lille a zawm a, chumi hnuah Italian club Lecce chu loan hmangin a zawm, a kum la tam vak lo mah se a khup hliam vangin a buai a, zai a nih hnuah pangngai takin a inkhel zui leh ta lo a ni.