China-ah Lakshya inlan dawn

China Masters Super 750 badminton tournament chu tunkar chhung hian khelh a ni dawn a, inelna hmachhawn tur hian Indian badminton player ṭha Lakshya Sen bakah Satwiksairaj Rankireddy leh Chirag Shetty te inkawp chu an inlan dawn.

Lakshya hian season a hmang ṭha lo, hliam vanga a buai bakah a inkhelh chhunah pawh a khel ṭha tawk lo ṭhin. Hong Kong Open khelh zawh takah erawh final a thleng a, tun ṭumah hian beisei a nei sang dawn, a bul ṭan nan Toma Junior Popov a hmachhawn ang.

Kum 24 mi Sen-a chuan, "Inrintawkna ka neih san a ngai hle a, match hmasa ber aṭangin a ṭha thei ang bera khelh ka tum ang. Tun hma lama ka boruak ang kha neih leh ngei ka tum, season tawp hma ngeiin chutiang chu a thlen pawh ka beisei," tiin a sawi.

Satwik leh Chirag te ṭangdun pawh kuminah an la hlawhtling thei chiah lo, semifinal vawi ruk ngawt thleng tawhin World Championship-ah pawh khan bronze medal an la, tun ṭumah hian an match hmasa berah Malaysian tlangval Junaidi Arif leh Roy King Yap te inkawp an hmachhawn ang.