Alcaraz leh Sinner an chawl hman lo

US Open an khelh zawhna a la rei lo a, mipa tennis player ṭha pahnih Carlos Alcaraz leh Jannik Sinner te chuan season tawp hmain inelna an hmachhawn chhunzawm leh nghal dawn.

Spanish star Alcaraz hian San Francisco-ah Laver Cup a khel dawn a, nikum khan Team Europe chu hlawhtlinna a lo chanpui tawh. Laver Cup dawtah hian Japan Open a khel leh ang - ATP 500 event hi chu a khelh vawi khatna tur a ni ang.

US Open champion a nih hnuah Alcaraz hian world number 1 nihna pawh Sinner hnen aṭangin a laksak nghal a, number 1 ni chunga season tawp hmang thei turin thapui a thawh chhunzawm a ni.

Alcaraz ang bawkin Sinner pawh a hahdam hman bik lo. Italian star hian China Open a khel thung dawn - Beijing khawpuia inelna hi ATP 500 event tho a ni a, kum 2023 khan a lo champion tawhna hmun niin nikum khan final a lut bawk.

Sanghai Masters-ah erawh player ṭha pahnih hi an inlan ve ve dawn, inelna hi ATP Masters 1000 a ni a, Grand Slam dawta tournament ngaihhlut leh ranking point tamna a nih avangin an tan a pawimawh.