Bechkham vanga LA Galaxy pantu Gerrard

Liverpool captain hlui Steven Gerrard chuan Los Angeles Galaxy a pan chhan chu England tana a khelhpui ṭhin David Beckham thurawn vang a nih thu a sawi.

Beckham hian Manchester United leh Real Madrid tan hlawhtling taka a khelh hnuin LA Galaxy hi a lo pan tawh a, MLS club-ah hian kum nga chamin a season hnuhnung ber December 2012-ah khan LA Galaxy hi MLS Cup-ah a champion pui a ni.

Kum 35-a upa Gerrard chuan, "David hi ka tan chuan ka entawn ber leh mi danglam, player ropui tak a ni a, USA a ka rawn kal hma khan a ni thurawn hi ka lak ber a ni," tiin LA Galaxy-a pan chhanah Beckham chu a inrawlh thuk hle niin a sawi.

LA Galaxy-ah Gerrard a tlangnel

Gerrard hian Anfield-a kum khat dang cham tura Reds-in contract thar an zawrh chu hnarin Galaxy lam pan hi a thlang a, Inrinni khian Mexican club Club America nen friendly match an khelh hunah a club thar tan hian a match hmasa ber a khel ang.

Liverpool-ah pawh number 8 ha ṭhin Gerrard hian LA Galaxy-ah pawh jersey number 8 a ha dawn a, Liverpool a reilote a lo khelhpui tawh Robbie Keane nen an khel dun leh dawn. Irish striker Keane hian kum 2011 aṭang khan LA tan hian a lo khel tawh a ni.

England captain hlui Gerrard chuan Keane vanga a tlangnel nghal thusawiin, "Robbie a lo awm sa avang hian ka tan chuan thil a awlsam sawt a ni. Ka chetsual loh nan player te hnenah inhmelhriattirna min neihpuiin ka hriat tur pawimawh tak tak min hrilh hria a, a tirah kha chuan naupang school kai thar ang mai ni mahila player fel tak takte avangin tunah chuan ka tlangnel tawh hle a ni," a ti.

Liverpool hmachhawn duh lo Gerrard

Gerrard chuan Liver­pool a chhuahsan hma khan sawmtu tam tak a neih thu sawiin, "Premier League a khelh chhunzawm zel turin min sawmtu an awm nual a, Europe club hrang hrang aṭang pawn sawmtu ka nei nual. Mahse, Liverpool hma­chhawn zawnga inkhelh ka duh loh avangin helai hmuna lokal hi ka thlang a ni," a ti.

Captain Fantastic tia hminglem an vuahsak chuan sawi chhun­zawmin, "Liverpool Football club hi ka hmangaih em em a, ka hmangaih reng bawk ang. Vawiin thleng hian Liverpool fan rinawm la ni mah ila chona thar hmachhawn a hun tawh a, ka team hmangaih em em tana squad ti kimtu player satliah nih hi ka duh lo a ni," tiin Liverpool-a contract thar a ziah loh chhan a sawi lang.

Gerrard chuan trophy chawi tura LA Galaxy a pan chhan sawiin, "Ka tana pawi­mawh ber chu hlawhtlin a ni. He hmunah hian hnehna chang tura lokal ka ni a, chawlh nuam taka hmang tur emaw sum tam tak hlawhchhuak tur ringawta lokal ka ni lo," a ti.