Button a contract pawhsei an tum lo

McLaren chairman Ron Dennis chuan TV interview-ah an driver Jenson Button a contract neih lai chu pawhsei tum­na an neih rih loh thu a sawi.

British driver hian nikum December thla khan kum hnih cham turin McLaren hi a zawm a, an inremnaah chuan kum khatah pound makta­duai 26.7 a hlawh mek.

World champion vawi khat lo ni tawh Button hian beiseina sang tak nen McLaren car khalh mah se an beisei angin a che ṭha tawk lo. Tun season intlansiak vawi kua awm tawh aṭangin Button hian point li chiah a la hmu a, a teammate Fernando Alonso pawhin point khat bak a la hmu lo.

An driver pahnih an chet chhiat em avang hian construction cham­pionship lamah pawh McLaren hian point nga chauh an la hmu a, an hnuaiah point la hmu lo Manor Marussia-Ferrari chiah an awm.

Hetianga an driver-te an chet ṭhat loh em avang hian McLaren team chuan an driver neih laite contract pawh sei ai chaun season thara driver thar lakluh an rilruk ta zawk niin a lang.

An driver chungchang an zawhna chhangin Dennis chuan, "Button hian nakkum December thla thleng kan hnehah contract a nei a, hei hi tunah chuan pawhsei tumna kan la nei hran lo. A nihna takah chuan tuna kan dinhmun thlirin sea­son tharah chuan kan car khalh tur midang kan la loang tih pawh a sawi lawk theih tawh lo a ni," tiin a sawi.

Dennis-a thusawi aṭang hian kum 35-a upa Button hi a contract neih­lai pawh hmang zo loin a chhuah hmel hle.