Pirlo nena kheldun tur Lampard a lawm

Chelsea legend Frank Lampard chuan New York City-a Andrea Pirlo nen an khelhdun dawn avanga a hlim thu a sawi.

Kum 37-a upa Lam­pard hi Thawhlehni khan New York City FC chuan an player thar a nihna angin an tlangzarh a, USA club-ah hian David Villa leh Andrea Pirlo te nen an khel ho dawn a ni.

Chelsea club chan­china goal khung hnem ber Lampard chuan, "David leh Andrea hi khawvela player ṭha ber pawl an ni a, an kianga ka khel ve thei tur hi ka lawm takzet a ni. New York game khelh tawh zawng zawngte kha ka en let leh vek a, player zawng zawngin an khelh dan phung ka hriat tawh avangin nitin anni nena khelh ho hi ka chak tawh takzet a ni," a ti.

July 12-a Toronto nen an inkhelh huna a MLS match hmasa ber khel tur Lampard chuan, "Pirlo hi player ṭha tak, lei hrul aṭanga free kick petah phei chuan khawvela ṭha ber a ni," tiin a team-mate thar tur chu a fak hle.

England international hlui Lampard rual hian Athletic Bilbao defender hlui Andoni Iraola chu New York City FC hian an tlangzarh bawk.