Basketball Pratham-a'n India a champion pui

South Asian Basketball (SABA) Championship-ah India an champion. Kumina Hunan, China-a neih tur FIBA Asian Championship khel turin an tling.

Pathianni khan Sree Kanteerava Stadium indoor courts-ah India-in an khingpui Sri Lanka 93-44 in an sawp.

Mizoram Super League season hmasa ber final-a Khatla TBL chakna kawnga player pawimawh Pratham Singh-a'n point 17 zet a vawm lut a, chakna kawngah player pawimawh a ni. Final-a che ṭha ber erawh Annadurai a ni a, Tamilnadu player hian point 22 a score bakah assists vawi li a nei bawk.

Pratham chuan, "Kan player pawi­mawh Amjyot Singh, Amritpal Singh, Satnam Singh leh player ṭhenkhat tel loa kan champion thei hi a pawimawh lai chu a ni. Player naupang zawkten an chance neih a hmang ṭangkai a, a lawmawm hlein ka hria," tiin a sawi.

India hi FIBA Asian Championship-ah Iran, Malaysia leh Japan te nen group khatah an awm ang.