Djokovic a nghing; mahse a tlu lo

Wimbledon mipa single champion lai Novak Djokovic chu last 16-ah a khingpui Kevin Anderson lakah nghing dawt mah se a tlu lo a, quarterfinal a inhlangkai.

Thawhṭanni zan khan Djokovic leh Anderson te hi Court One-ah an inkhel a, set hnih ve ve an lak hnuah eng(light) ṭhat loh vangin set ngana an khel thei lo. Thawhlehni zan khan an khelh hmabak set khat la awm chu khelh chhunzawmin Serbian star Djokovic hian 6-7, 6-7, 6-1, 6-4, 7-5 in hnehna a chang a ni.

South African star seeded 14-na Anderson hian a service nat hmang ṭangkaiin set hmasa pahnih chu a la nghal. Mahse hun pawimawh a che fuh ṭhin Dojokovic a zam lo, hnehsawh taka set thumna a lak hnuah set lina pawh ala zui bawk. Anderson hian set li an khelh chhung hian vawi 32 zet ace a vaw chhuak hman a ni.

Thawhlehni zana set ngana an khelh ṭum hian ser­vice nei ṭha an ni ve ve bawk a anmahni service hum chho zelin game nga ve ve an la. Game ruknaah Anderson-a'n service-in dinhmun ṭhaa inhlankaina hun a nei. Mahse South African hi hun pawimawhah che sualin double fault a nei a, a service a hloh. Seeded pakhatna Djokovic-a'n service ve lehin a chesual ve lo.

World number one Djoko­vic hian a zawnin Wimbledon quarterfinal vawi sarih a lut a, a vawi 24 nan Grand Slam quarterfinal a luhna chiah a ni.

Kum 29-a upa Anderson hian tun hmain Grand Slam tournament-ah quarterfinal ala lut ngai lo a, tun ṭumah a record duhawm lo tak hi thaibo turin beiseina nei sang hman viau mah se a beiseina chu Djokovic-a'n a tihtawp sak a ni.

Seeded pakhatna Djokovic chuan, "Kevin khan service a neih ṭhat em avangin inkhelh a harsa takzet. Wimbledon-a ka inkhelh tawhah chuan a harsat ber ṭum ala ni hial ang. Game level sang tak kan khel niin ka hria. Set hnih ka hloh hnu kha chuan beiseina ka nei tlem tawh hle a, mahse ka vannei hram a ni," tiin a sawi.