Benedito-a'n Arda Turan a duh lo

Barcelona presidential candidate Agusti Benedito chuan Atletico Madrid aṭanga Arda Turan lakluh chu thil ṭul lo leh club tana buaina thlentu mai mai a nih thu a sawi.

Turkish midfielder Turan hian Thawhlehni khan pound maktaduai 24-in Barcelona hi a pan a, July 18-a president thar thlang tur Catalan club hian an duh chuan president thar an neih hunah an leina man zat pangngai aia 10% a hniamin Atletico lamah hian an hralh let leh thei ang.

Barca president thar tura beiseiawm Benedito chuan January thleng an player thar chu an hman theih dawn chuan loh avangin awmze nei lo transfer nia a hriat thu sawiin, "Buaina lian tak Turan leitute hian min hnutchhiah a ni. Thla ruk chhung kan hman theih loh tur player lakluh chu engnge a ṭangkaina awm? Kan hriatreng tur chu hei hi a ni; president hlui Maria Bartomeu vang khan FIFA dan hnuaiah hrem kan ni mek," tiin dik lo taka kum 18 hnuailam player an lakluh vanga hremna an tawrh mek chhanah Barca president hlui a puh.

Benedito chuan Barca president a thlan tlin a nih phawt chuan Atletico lamah Turan a hralh let lehnghal tur thu sawiin, "Club president lailawk Ramon Adell pawh ka be tawh a, president mumal neih loh laia Arda lakluh hi club zah lohna leh hmuhsitna a nih thu ka hrilh a ni," a ti.