Crystal Palace player man to ber tur Cabaye
Season hman zawh taka beisei aia che ṭha Crystal Palace chuan an club chanchina player man to ber ni turin Paris St-Germain midfielder Yohan Cabaye an la lut hnai ta.
Palace leh French Ligue 1 champion PSG te hi Cabaye man tur chungchangah hian an inbe fel tawh a, French midfielder manah hian Palace chuan pound maktaduai 10 an sen a ngai anga, thil dang behbawm nen chuan pound maktaduai 13 thleng kai chho thei tura ngaih a ni.
Premier League club Palace leh Cabaye hi hlawh chungchang leh contract sei zawng turah a thu phungin an inrem tawh a, medical chiah platlang ngai a awm tawh.
Kum 29-a upa Cabaye hian January 2014 khan pound maktaduai 19-in Newcastle United aṭangin PSG a pan a, mahse French club-ah hian beisei angin hmun a chang tam lo.
Cabaye hian medical a paltlanga Palace hi a zawm a nih chuan Palace club chanchin a player man to ber tur a ni dawn a, nikum nipui transfer-a Palace-in Wigan aṭanga an lakluh James McArthur-a man pound maktaduai 7 chu a rawn khum dawn tihna a ni ang.
Palace manager ni mek Pardew leh Cabaye te hi Newcastle-ah an lo inhrawn tawh a, Pardew hian kum 2011 khan French club Lille aṭangin Premier League lamah hian a senglut. Magpies tan hian vawi 93 inlanah goal 18 khungin fan-te player duh ber pawl a ni hman nghe nghe.
PSG-ah erawh Thiago Motta, Javier Pastore, Marco Verratti leh Blaise Matuidi te an awm avangin bench aṭangin a tlan lut tlangpui a, vawi 53 a inlanah goal thum chiah khungin vawi 13 inkhel bul a ṭan a ni.