US-in bul ṭan fuh

Nilaini khan Clint Dempsey goal hnih khung hmangin USA chuan 2015 CONCACAF Gold Cup-a an match hmasa berah Honduras chu 2-1 in an hneh.

CONCACAF Gold Cup hi North America, Central America leh Caribbean a ram hrang hrang 12 te inelna niin kumniah hian US leh Canada-in an inthlen ṭawm a ni. He inelnaa champion tam ber chu Mexico niin vawi ruk an champion tawh.

Texas-a Toyota Stadium-a inkhelah hian manager Jurgen Klinsmann-a enkawl US team tan captain Dempsey chuan minute 24 leh 64-ah goal a khung a, Man-of-the-match ah thlan a ni nghe nghe. Honduras goal neih chhun hi second half-a Carlos Discua thun a ni.

CONCACAF Gold Cup-ah hian US hi champion lai an nih bakah vawi nga ngawt an champion tawh a, kuminah hian a vawi ruk nan champion leh tumin champion tura beisei awm ber pawl an ni mek.

Inkhel dangah Haiti leh Panama te chu goal khat ve ve khungin an inhnehtawk bawk.