2015 Indian Super League player auction bihchianna
July 10, Zirtawpni khian Mumbai-ah 2015 Indian Super League player zawrhna(auction) neih a ni dawn.
ISL kalhmang
Season tharah hian kum hmasa ang bawkin team tinin Marquee player neih tur a ni. Marquee player hi ISL1-a an hman tawh an hmang nawn thei a, player thar an la lut thei bawk.
Club-te hian international player pariat an nei thei. Season liamtaa an foreign player pakhat aṭanga panga an chelh thei a, international players draft paltlang kher loin an mamawh ang player an la lut thei bawk.
Club hian ramchhung player pakhat aṭanga paruk an chelh thei a, club chelh zui loh player hi ISL club dangin May 2015 thleng khan an la lut nghal tawp thei a, hemi hnua club nei lo chu domestic draft list-a telh tur an ni.
Team khatah hian player 22 tal an awm tur a ni a, hei bakah hian hmasawn thei player pahnih an awm bawk tur a ni. Chumi awmzia chu club tinin marquee player pakhat, international player pariat, ramchhung player 13 leh hmasawn thei tura beisei player pahnih an nei ngei ngei tur a ni.
Marquee Player
Atletico de Kolkata, Delhi Dynamos, Kerala Blasters leh Pune City ten an marquee player tur an la puang lo.
Chennaiyin FC-in marquee player-ah Manchester City midfielder hlui Elano an hmang chhunzawm a, Mumbai City-in coach leh player nikawp turin Nicolas Anelka an chelh bawk.
Goa-in marquee player-ah 2002 FIFA World Cup-a Brazil champion puitu defender kum 37-a upa Lucio an la lut tawh a, Northeast United-in Portuguese winger Simao an la lut. Kum 35-a upa Simao hi Benfica, Barcelona, Atletico Madrid bakah Europe-a club langsar tak takah a khel kual tawh.
Foreign Players
Atetletico de Kolkata-in Josemi, Ofentse Nato leh Borja Fernandez te an chelh a, Chennaiyin FC-in Bernard Mendy leh Bruno Pelissari te an kawl zel.
Delhi Dynamos-in Hans Mulder leh Gustavo Marmentini te chiah an chelh a, Goa-in Delhi ang thoin player pahnih Gregory Arnolin leh Bruno Pinheiro te an kawl zui zel bawk.
Kerala Blasters-in midfielder Pulga chiah an la tichiang a, Northeast United-in Miguel Garcia leh Kondwani Mtonga te an kawl bawk. Pune City leh Mumbai City ten foreign player chelh an nei lo.
Ramchhung Player
Indian player an tam ber a, club tinin player paruk chauh an chelh theih avangin lut leh chhuak an tam hle.
ISL hmasa bera Indian zinga goal khung tam ber Chennaiyin FC-in Jeje Lalpekhlua an chelh a; Delhi Dynamos-in Robert Lalthlamuana leh S. Malsawmtluanga te an kawl zel a; Mumbai City-in Lalrindika Ralte an ring zel bawk a, Lalrinfela erawh an chelh tawh lo thung.
Northeast United player zingah Shillong Lajong winger Zodingliana Ralte a tel lo a, Armed Veng rawlthar hi domestic draf list-ah telh a ni.