Player 114 aṭangin 40 vel thlang chhuak dawn
ISL-ah team riat chiah an awm a, foreign player ṭhahnem tak an tel bawk avangin Indian footballer ṭha bik tan lo chuan tel theih a ni lo.
Season hmasa berah Mizo paruk an awm a, season hnihnaah pali an awm chiang tawh. A dang an awm belh ang em?
Player auction
ISL-ah khan I League club ṭhenkhat an hel a, India player ṭha zawng zawng an tel thei lo. ISL2-ah chuan India player ṭha chu hmaih an ni lo.
Player auction hi club la nei lo, player ṭha bik 10 tana buatsaih a ni. Chung zingah chuan India captain Sunil Chhetri a tel a, I League best player Jackichand Singh a tel bawk. Player tin hi base price (lei theihna tlawm ber) an nei vek.
Domestic draft
Domestic draft-ah hian player 114 zet an awm a, player auction-a thlan loh player-te'n an belh bawk ang.
Domestic draft-ah hian ISL season 1 khel tawh player 30 an awm a, Northeast United midfielder Adinga bakah Kolkata midfielder Calvin Lobo leh defender Mohammed Rafique te, Chennaiyin keeper Shilton Paul te, Delhi Dynamos midfielder Steven Dias te chu player langsar an ni. ISL2 an khelh lehna chance a sang hle.
Mizo dang dinhmun
I League season khelh zawh taka Mizo player-te chet dan thlirin ISL2-ah hian Mizo tam zawk an awm a beiseiawm hle.
ISL la khel lo player 84 zingah hian Mizo 11 an awm. Chungte chu Bengaluru trio Beikhokhei Beingaichho, Lalchhuanmawia leh Lalthuammawia Ralte te, Royal Wahingdoh player C. Lallawmzuala, Lalchhawnkima, Lalhmangaihsanga leh Laldinmawia te, Pune FC player Lalrempuia Fanai, Lalramluaha leh Zohmingliana Ralte te bakah Shillong Lajong midfielder Joseph Lalfakzuala te an ni.