Wimbledon Serena hmaa ding tur Sharapova

Zanin hian Serena Williams leh Maria Sharapova te chu Wimbledon 2015 final luh inchuhin Centre Court-ah an inkhel ang.

American super star Williams leh Russian star Sha­ra­pova te hi vawi 19 an lo inhmachhawn tawh a, hengah hian William hi a chungnung hle. An intawn hnuhnung vawi 16-ah a chak fai vek. An sulhnu en mai chuan zaninah pawh hian Serena hi chungnung zawk tura ngaih a ni.

Mahse, hei erawh kan hriatreng a pawimawh ang. Kum 2004 Wimbledon final-ah khan kum 17 chauha upa ni chungin Sharapova hian Williams hnehin champion thei naupang ber a lo ni tawh.

Semifinal thleng turin seeded pakhatna Williams hian Thawhlehni zan khan Centre Court-a mipui 15,000 hmaah Victoria Azarenka chu 3-6, 6-2, 6-3 in a hneh a ni. Darkar hnih leh minute nga chhunga hnehna chang turin Williams hian vawi 17 zet ace a siam.

A vawi ruk nana Wimble­don champion nih tum Williams chuan, "Kar hnih dawn kan inkhelh tawh avangin ka taksa a chauh ve tawh a, semifinal-a ka khingpui tur Maria hi player ṭha tak a nih avangin hna hautak tak ka hmachhawn dawn tih a chiang. Amaherawhchu hlawhtling ngei turin ka bei zel dawn," tiin final luh a tum ruh hle.

Grand Slam vawi 20 champion tawh Serena hi tun hnaiah a zawnin match 26 zet a chak zawn tawh avangin Sharapova hna hi a awlsam dawn lo hle.

Kum 2004 champion Sharapova paw'n world number 47 Coco Vandeweghe chu 6-3, 6-7, 6-2 a hnehin a vawi nga nan semifinal a lut ve bawk. Grand Slam vawi nga champion tawh Sharapova hian a vawi ruk nan champion leh a tum a nih chuan tun hnaia a tih theih ngai loh Williams hneh a ṭul dawn a ni.

An inkhel tur chungchang sawiin kum 28-a upa Sharapova chuan,"Chak tura rin zawk chu ka ni lo tih ka hria. Williams hi khawvela hmeichhe tennis player ṭha ber te zing ami a ni tih chu ka hria a, kan intawn tawhah pawh ka hneh lo ṭhin hle. Mahse, khang ka chak loh tawhna te kha chu theihnghilh a ṭul ang, chak ngei tumin ka bei dawn a ni," tiin chak lo turah a indah phal bik lo.

Semifinal leh lamah seeded 13-na Agnieszka Radwanska leh seeded 20-na Garbine Muguruza an inkhel bawk ang.

Kum 2012 finalist Radwans­ka hian semifinal thleng turin unforced errors vawi 40 zet nei chungin Madison Keys chu 7-6, 3-6, 6-3 in a hneh. Kum 26-a upa Polish professional tennis player hian a vawi thum nan quarterfinal a paltlang a ni.

Radwanska khingpui tur Muguruza pawh a nep bik lo hle. Swiss seeded 15-na Sanchez Vicario chu straight set 7-5, 6-3 in a hneh. Spaniard kum 21-a upa Muguruza hian a vawi khat nen Grand Slam semifinal a khel ve dawn a ni.