Tottenham player thar Alderweireld

London khaw club Tottenham Hotspurs chuan Atletico Madrid aṭangin defender Toby Alderweireld an la lut. Belgium international hian kum nga cham turin White Hart Lane-ah hian contract a ziak a, a man zat erawh puanzar a ni lo.

Kum 26-a upa defender hian season hmasa kha loan-in Southampton-ah hun a hmang a, Saints tan hian Premier League match 26 lai a khel a ni.

Alderweireld chuan Tottenham player thar a ni thei chu a lawm takzet thu sawiin a team-te nen hun duhawm tak an hman ho a beisei thu a sawi.

Belgium tana vawi 47 lai inlan tawh Alderweireld chuan, "Spurs hi club lian tak a ni a, hetiang ang club liana khelh hi chu duhthusam a ni fo ṭhin. Tunah chuan ka duhthusam ram a thleng dik ta bawk a, ka hlim em em a ni. Ka theihna zawng zawng chu he club tan hian ka hlan ang," tiin Spurs a zawm thei chu a lawmthu a sawi.

Dutch club lian Ajax-a bul ṭantu Alder­weireld hian White Hart Lane-ah hian Bel­gium tana a khelhpui ṭhin Nacer Chadli, Mousa Dembele leh Jan Vertonghen te a zawm ang.

Southampton hian Atletico aṭanga Alder­weireld an hawh khan an duh chuan season tawpah pound maktaduai 6.8-in Belgian defender hi an la lut thei ang tih a ni a, an inremna hi Atletico lamin an duh chuan pound maktaduai 1.5-in an lei let thei ang tih a ni.

Saints lamin Alderweireld hi a ngheta St. Mary's lama lakluh an duh a, Atletico lamin an inremna hi sum hmangin an lei let bawk si lo a, Southampton hian Spanish club lakah hian thubuai an siam ngei rin a ni.