Guardiola-a'n Brazil enkawl a châk - Dani Alves

Brazil defender Dani Alves chuan Barcelona-a a pu hlui Pep Guardiola-a'n Brazil enkawl a chak ṭhin thu a sawichhuak.

Barcelona defender ṭang­kai Alves chuan, "Pep khan Brazil a enkawl châk thu sawiin World Cup-a champion tir leh a duh thu a sawi a, World champion-a Brazil chhuah leh thei tur khan ruahmanna pawh a nei sa vek a ni," a ti.

Kum hnih dang Bar­celona-a cham tura contract thar ziaktu Alves chuan Brazilian a nih loh vang maia Guardiola duh loah Brazil FA chu a puh a, "Brazil football official te'n Pep an duh loh chhan chu hnam dang a nih vang a ni a, Brazil-in hnam dang coach a pawm theih an beisei lo a ni," a ti.

Khawvela coach ṭha ber pawl Guardiola hian Barcelona a enkawl chhungin trophy liantham 14 lai a chawi pui a, season li Nou Camp-a a cham chhung hian Champions League nomawi pawh vawi hnih ngawt a chawi pui thei a ni. Kum 2012 khan Bayern Munich lamah a insawn a, German club-ah pawh hian a hlawhtling hle.

Kum 32-a upa Alves chuan a pu hlui chu khaw­vela coach ṭha ber a nih thu sawiin, "Ropui takin football a thlak danglam a, team ropui tak a din bawk a, chutiang ang coach ropui seng luhna hun ṭha chu kan nei a ni. Khatiang hun ṭha kha i bawh pelh a nih chuan national team hi i ngaihtuah tak tak lo tihna a ni," tiin a coach ngaihsan an lakluh theih loh avangin Brazil offical-te chu a dem hle.

Kum 2014 World Cup-ah khan Brazil hian semifinal an inhlangkai a, mualpho taka 1-7 a Germany hneh loin an rama World Cup khelhah an champion zo lo a ni.