Liverpool tour-a tel loh diltu Sterling

Tun hnaia Liverpool chhuahsan tur anga sawi thawm awm reng Raheem Sterling chuan season ṭan hma tour Reds-in an neih turah tel loh a dil.

Liverpool hian season ṭan hma inbuatsaih nan Pathianni khian Bangkok an pan dawn a, Thailand khawpui bakah hian Australia leh Malaysia-ah te tour hi an nei dawn a ni.

English winger Ster­ling hi Thawhṭanni khan Liverpool boss Brendan Rodgers hnenah player dang ang bawkin a in report leh tawh a, mahse season thara Anfield chhuahsan ngei a duh avangin tour-naah hian kal ve loh a dil.

Kum 20-a upa Liver­pool rawlthar duhawm hi Etihad Stadium lama lakluh tumin Manchester City chuan ṭum hnih lai an lo dawr hlawhchham tawh a, Liverpool-in a man zat atan an chhiar pound maktaduai 50 hnaih thuakin a vawi thum nan reds hi dawr nawn leh an tum nia sawi a ni.

Sterling-a'n tour a kal ve loh a dil chungchangah hian Liverpool lamin engmah thuchhuah an la siam lo a, player in fit ṭha leh an chawlh hmang zo tawh zawng erawh an tour-ah hian hruai vek an tum nia sawi a ni.