Wimbledon Murray-a hmabak a hautak dawn
Vawiin tlai dar 5:30 hian Wimbledon mipa semifinal-ah seeded no. 1 Novak Djokovic leh Richard Gasquet te an inkhel dawn a, hemi zawh hian British mipui ṭan rawn Andy Murray leh record nei ṭha Roger Federer ten an khel leh ang.
Nilaini zan khan Murray-a'n semifinal lut turin Vasek Pospisil a hneh a, kum sarih chhunga semifinal vawi ruk luhna a ni. Swiss superstar Federer hian Wimbledon-ah vawi sarih zet a champion tawh thung.
2012 Wimbledon final khan Murray leh Federer te hi an lo inhmachhawn tawh a, Federer a chak. Hemi hnu hian Swiss star hi a la champion leh lo a, Murray erawh kum 2013 khan a champion.
Kum 28-a upa Murray chuan semifinal an khelh tur thlir lawkin, "Khawvela tennis player piang tawh zinga ṭha bera an sawi ka hmachhawn dawn avangin ka hna hi a awlsam dawn lo tih chu a chiang," a ti.
Murray hian quarterfinal-ah darkar hnih leh minute 13 chhung lekin world number 56 Pospisil a hneh a, a hmachhawn tur seeded pahnihna Federer pawhin semifinal lut turin Gilles Simon chu darkar khat leh minute 34 chhungin a hneh ve bawk. Federer hian kumin inelnaah set a la hloh lo.
Amaherawhchu Federer hi Simon-a'n a service a chhuhsak. Thla hmasaa Gerry Weber Open first round-a a service a hloh hnua a vawi khat hloh lehna chiah a a ni a, vawi 116 zet a service a zawnin a hum hman.
Grand Slam vawi 17 chawi tawh Federer chuan, "Ka ngaihdan chuan kum 2012 final kan khelh tur ang mai kha niin ka hria. Tunlai hian ka khelh ṭha a, Andy hian hun duhawm a hmang ve mek bawk. An rama inkhel kan nih avangin mipui zawng zawngin an ṭan tih ka hria, mahse chu chu ka tan zam phahna tur a ni lo ang," tiin final luh a tum hle.
Khaikhinna tawi
Federer Murray
33 Kum 28
Swiss Ram Britain
2 Ranking 3
86 Champion zat 34
17 Grand Slam Nomawi 2
Dan rual loh Djokovic
Champion lai Novak Djokovic chuan Marin Cilic hnehin Wimbledon 2015 semifinal a inhlangkai a, khawvela tennis tournament upa bera vawi 50 hnehna a channa chiah a ni.
Kum 28-a upa Djokovic hi Wimbledon-ah a zawna kum ruk semifinal a luhna a ni a, vawi 27 Grand Slam tournament-a semifinal a luhna chiah a ni bawk.
Last 16 inkhelah African star Kevin Anderson lakah hautak takin hnehna chang hram mah se Centre Court-a inkhelah erawh world number 1 Djokovic hi a khel ṭha takzet a, a service a hum vek mai pawh ni loin Cilic tan hian hun ṭha a siam lo hrim hrim.
Set tinah hian vawi khat ṭheuh Djokovic hian Cilic-a service a chhuhsak. Seeded pakuana Cilic hian vawi khat mah Djokovic a service a chhuksak lo mai lo a, 'break point' pawh a hmu lo hrim hrim a ni.
Serbian super star Djokovic hian final lut turin Stanislas Wawrinka hnehtu Richard Gasquet a hmachhawn leh ang.
A inkhelh hmabak thlir lawkin Djokovic chuan, "Ka khingpui tur Gasquet hian semifinal thleng turin player ṭha a ni tih a pholang chiang tawh. Stan nena an inkhel kha kan en chuan a tumruh zia kan hmu chiang. Hei vang hian ranking zawnga chhut tur a ni lo a, a sang pali zinga tel thei a nih avangin dah hniam theih a ni lo. Ka chamipon nomawi humhim tur chuan a ṭa thei ang bera ka khelh a ngai ang," a ti.
Kuminah hian seeded palina Stan Wawrinka hi chakin semifinal lut ni sela chuan kum 20 chhunga a vawi khat nan seeded pakhatna aṭanga palinain last four an thleng tur a ni. Amaherawhchu, French Open champion lai hi seeded 21-na Gasquet lakah 6-4, 4-6, 3-6, 6-4, 11-9 in a chak lo a ni. Kum 2007 hnua a vawi khat nan Gasquet hian Wimbledon semifinal a lut a ni.
Semifinal-a inkhel tur Djokovic leh Gasquet te hi vawi 13 an lo inkhel tawh a, Gasquet hi vawi khat chiah a la chak.
Hmeichhe double-ah Indian nula Sania Mirza leh Martina Hingis te ṭang dun chuan semifinal an lut a, vawiin tlai dar 4:00 hian Raquel Kops-Jones leh Abigail Spears te inkawp nen an inkhel ang. Mirza leh Hingis te hian mixed doubles-ah pawh quarterfinal an lut a, nimin khan Mirza leh Bruno Soares inkawp chuan Alexander Peya leh Timea Babos te inkawp an hmachhawn a; Hingis leh India star Leander Paes te inkawpin Marcin Matkowski leh Elina Vesnina te an hmachhawn ve bawk.
Semifinal inkhel turte:
Seed Player Player Seed
1 Djokovic (SER) Vs Gasquet (FRA) 21
3 Murray (GB) Vs Federer (SWI) 2
Inkhel hmasa ṭan hun hi tlai 05:30 PM a ni a, Star Sports2-ah Live tur a ni.