United player lakluh pahnihna Darmian

Manchester United-in Italian club Torino aṭangin Matteo Darmian an la lut dawn. Torino manager Giampiero Ven­tura chuan he thu hi a nemnghet.

Kum 25-a upa Dar­mian manah hian club pahnih hi pound mak­taduai 12 bawr velin an inrem nia ngaih a ni. Sky Italia journalist Fa­brizio Romano chuan Italian right back hian kar khatah pound nuai khat a hlawh ang a, kum li daih contract a ziak dawn niin a sawi.

United manager Louis van Gaal-a khelh duh danah right back awm sa Rafael Da Silva a tel lo niin a lang a, season limata khan winger Antonio Valencia a hmang fo. Hei vang hian Dani Alves, Nathaniel Clyne leh Seamus Coleman te an dawr a, an chan tak loah chuan Darmian hi an la lut ta a ni.

Darmian chuan, "Turin ka chhuah­san a ngai ta. Kum thum chhung khan thil tam tak ka zir a, ka tan chuan hun pawimawh a ni. Ka teammate-te, min ṭantute, kan coach Ventura te chungah ka lawm hle a ni. Ventura hi ka tan chuan coach a ni satliah lo a, pa anga ka en a ni," tiin a sawi.

Italian right back chuan sawi zelin, "Turin hi ka in (home) pahnihna a ni reng ang. Ka chhuahsan chhan hi ka sual vang a ni lo a, ka hmasawn zelna tur atana pawimawh a nih vang a ni," tiin a sawi.

Manchester United hian pre season tour nei turin Thawhṭanni khian Seattle lam an pan dawn a, hemi hma hian Darmian-a contract chungchang hi ziah fel an tum.

Van Gaal hian pound maktaduai 31-in Dutch winger Memphis Depay a la lut tawh a, Italian defender hi tun transfer-a player pahnihna tur a ni a, a tawpna tur a la ni lo.

Tunge Darmian?

Matteo Darmian hi December 2, 1989 khan Legnano, Italy-ah a piang a. AC Milan youth system chhuak a ni.

Italian defender feet ruka sang Darmian hi Milan senior team-ah kum 2006 aṭanga 2009 thleng awmin vawi li chauh a khelh hman. Kum 2009-ah loan-in Serie B club Padova a zawm a, kum khat a khelh hnuah Palermo a zawm.

Milan leh Palermo hian Darmian-a neitu nihna an nei ve ve a, July 2011 khan intuaihriam turin Serie B club Torino a zawm.

Darmian hian Torino hi Serie A-ah a kai pui a, league-ah vawi 33 zet a inlan. Palermo-in €500,000 in Milan neitu nihna an lei chhuak a, Torino-in Palermo hi €825,000 pe bawkin Dar­mian neitu hi club pahnih an la ni tho.

2012-13 season-ah Serie A-ah vawi 30 a inlan a, Torino-in Palermo hneNah euro maktaduai 1.5 pein neitu nihna an nei pumhlum.

2013-14 season-ah vawi 37 zet Serie A-ah a inlan a, Serie A Team of the Year thlanchhuahah a lang phak hial.

Season hnuhnung berah hian Europa League an khelh avangin league-ah vawi 32 a khel a, inelna hrang hranga a khelh zat hi match 47 niin goal nga a khung nghe nghe.

Darmian hi Italy tan age level hrang hrangah a khel vek a, senior team tan vawi 13 a khel tawh. 2014 FIFA World Cup-ah Italy-in groupstage an paltlang lo a, Darmian hian match zawng zawngah starting eleven a chang vek.

Kum 25-a upa Darmian hian centre back-in bul a ṭan a, a hnu lam­ah chuan fullback-ah a khel thei ve ve a, dinglamah a khel tam zawk. A kheh dan hmangah hian Italian defender ropui Paolo Maldini nen an tehkhin ṭhin a, 2012-13 season khan match khatah tackle vawi 5.3 zel nei ang a ni a, Europe-a league sang pangaah tackle a ngah ber a ni.