Dortmund chhuahsan lo tur Hummels

Manchester United rim lai German defender Mats Hummels chuan a club khelh mekna Borussia Dortmund chhuahsan tumna a neih loh thu a sawi.

Kum 26 a upa defender chuan, "Club lian takin min duh tih hriat hi a lawm­awm em em a, a bik takin khawvela club lian ber pawl Manchester United te angin min duh tih hriat hi chu chawimawina ropui tak a ni. Mahse, tun kum atan chuan Dortmund chhuahsan rih loh hi ṭha ka ti a, he hmuna la cham rih tur hian thutlukna ka siam a ni," a ti.

Manchester United ma­nager Louis van Gaal-a'n rei tak chhung a lo rim tawh Hummels hian kum 2009 khan Bayern Munich aṭangin Dortmund a pan a, Bundesliga title vawi hnih chawi tawhin Signal Iduna Park-ah hian kum hnih cham turin contract a la nei a ni.