Carragher-a'n Liverpool fan te'n Sterling an huat a hlau
Liverpool defender ropui chawl ta Jamie Carragher chuan tun hnaia Raheem Sterling-a khawsazia chuan Liverpool fan te huat a hlawh tir a hlauhthawn thu a sawi.
Kum 20-a upa English winger hian Liverpool-in Bangkok, Australia leh Malaysia-a season ṭan hma inbuatsaihna atana tour an neih turah tel loh a dil a, Nilaini khan damloh chhuanlamin Liverpool training a zawm lo bawk.
A vanglai hun zawng zawng Liverpool tana hmang zo tu Carragher chuan, "Sterling hian nakin zela ama tana ṭha lo tur thil a ti a, a khawsazia vanga vawiina a hmingchhiatna hi thaireh leh a harsa tawh dawn a ni," tiin Sterling chu Liverpool fan te'n an huat rawn tawh tur thu a sawi.
Carragher chuan sawi chhunzawmin, "Tunah hian Manchester City fan-te chuan reilo teah Liverpool fan-te tawrh ang hi kan tuar ve mai ang em? tiin Sterling mizia hi an thlir reng a ni," tiin chhuah duh mah se Sterling khawsazia chu uchuak nia a hriat thu a sawi.
Tun hnaia Soccerex-in khawvel footballer kum 21 hnuai lamte hlut zawng an zirchianna a hlu ber nihna hauhtu Sterling hian May thla khan Liverpool-in kar khata £100,000 hlawh tura contract thar an zawrh chu a lo hnar tawh a, Manchester City lam pan a chak nia sawi a ni.
Manchester City paw'n Sterling hi Etihad stadium lama sengluh ngei tumin pound maktaduai 25 leh 40-in Liverpool an dawr tawh a, mahse Liverpool lamin an rawlthar manah hian pound maktaduai 50 lai an chhiar avangin City dawrna hi an hnar ve ve. City lamin Reds hi Sterling man atana an phut zat pound maktaduai 50 hnaih thuaka dawr leh an tum nia sawi a ni.
Hetihlai hian Liverpool chuan Atletico Madrid aṭanga an hawh Spanish defender Javier Manquillo chu a club lamah an let tir leh a, loan-a an hawh chhung tur rei zawng hi kum hnih tih nimahse Liverpool lamin inkhelhna hun an pek tam theih tawk loh avangin Atletico Madrid nen inbe remin a club lamah hian an kir tir leh ta zawk a ni.