FIFA-in damchhung atan Chuck Blazer an hrem
Khawvela football thuneitu sang ber FIFA chuan an executive committee member hlui leh CONCACAF general secretary hna lo thawk tawh ṭhin Chuck Blazer chu damchhung atan football kaihnawih thil hrim hrim-a inhnamhnawih thei tawh lo turin an hrem.
Kum 70-a upa Blazer hi chhiah awlruk, eiruk thubuai leh thamna sum lak te avanga US Court-in thiamloh a chantir hnuin US thuneitute tan a rukin a thawk a, FIFA chhungkuaa eirukna thubuai leh thuruk awmte haichhuak tura US sorkar puiin May thla khan FIFA offical 14 lai chu US department of Justice chuan eiruk thubuai a siamsak a ni.
FIFA thuchhuak chuan Blazer an hrem chhan chu FIFA dan tam tak a bawhchhiat vang niin an sawi.
Blazer hian kum 1990-2011 inkar khan CONCACAF general secreatry hna a thawk a, kum 1997-2013 inkar khan FIFA-ah executive committee member a ni bawk.
Kum 2013 khan US court chuan thubuai hrang hrang sawm a siamsak a, court hmaa a inpuannaah hian Blazer chuan South Africa 2010 World Cup chungchangah khan FIFA executive committee member engemawzat in thamna sum an lak thu a puang a, kum 1998-ah khan thamna sum vir vel a buaipui thu a sawi bawk.