Nzonzi manah Stoke City leh Sevilla an inrem

Stoke City leh Spanish club Sevilla te chuan Steven Nzonzi manah inremna siamin French midfielder hian Europa League champion team hi a zawm ngei dawn niin a lang ta.

Potters (Stoke sawina) boss Mark Hughes chuan Sevilla nen hian Nzonzi manah an inrem thu sawiin inbiakna neih an phalsak thu a puang a, kum 26-a upa Nzoni manah hian Sevilla chuan pound maktaduai 7 an thehchhuak nia sawi a ni.

Hughes chuan, "Kan theihtawp chhuahin Nzonzi hi kan club-a cham tir chhunzawm zel kan tum a, mahse chona thar hmachhawn a chak avangin kan tan chuan chelh chhunzawm zel theih a ni ta lo a ni," a ti.

Nzonzi hian kum 2012 khan Blackburn Rovers aṭangin pound maktaduai 3-in Stoke hi a pan a, Potters tan match 120 a inlan hman.

Stoke City goalkeeper Asmir Begovic chu Chelsea nen sawizawm an ni mek bawk.