Advocaat-a'n lawmthu a sawi

Sunderland manager Dick Advocaat chuan a nupui pangpar petu supporter chungah lawmthu a sawi.

Kum 67-a upa Dick Advocaat hian a nupui duhdan angin coaching career chawlhsan a tum hman a, amaherawhchu thutlukna sutin season tharah Black Cats boss a nih chhunzawm dawn.

Advocaat chuan, "Supporter-te'n ka ina pangpar an thawn vawi khatna a ni a, ka lawm takzet a ni. Ka chhungte vangin club enkawl chhunzawm loh ka tum a, mah se enkawl zel tura ka thutlukna min pawmpui hnuah ka rawn let a ni," tiin a sawi.

Dutch manager-in a thutlukna a thlak avangin Sunderland supporter an lawm a, lanchhuah tir dan pawh an thiam. Supporter ṭhenkhat chuan pawisa thawh khawmin Advocaat-a nupui pangpar an thawn. Pangpar man atana an pawisa thawh khawm hi India pawisa chuan nuai khat vel a ni.

Netherlands, Belgium leh Russia coach hlui Advocaat hian season khat chhung atan contract a pawtsei. Black Cats hian Liverpool defender Sebastian Coates leh Celtic full-back Adam Matthews te an la lut tawh a, Dutch manager hian player pathum pali vel lak an la tum thu a sawi.