Delhi Dynamos player-manager tur Carlos

India Super League club Delhi Dynamos chuan an manager atana Brazil legend Roberto Carlos an lakluh thu an puan hnu lawkin an coach chu marquee player a nih nghal tur thu an puang zui.

Kum 42-a upa Real Madrid defender hlui hian player a nih laia a hun tawp lam a hman na Russian club Anzhi Makhachkala-ah player-manager hna hi match nga chhung chu a lo thawk tawh a, vawi hnih chak, vawi hnih chak loh leh vawi khat draw result Anzhi hi a hlawhchhuahpui a ni.

A hunlaia khawvel defender ṭha ber pawl Carlos hian competitive match a khelh lohna a rei tawh hle a, professional player a nihna laia a match hnuhnung ber chu September 26, 2011 daih khan a khel tawh a ni.

Hetihlai hian FC Goa coach Zico chuan Turkish club Fenerbahce-a a lo enkawl tawh Roberto Carlos chu inkhel tura a upat mah mah tawh thu sawiin kum thum aia tam mah a inkhelh tawh loh avangin tunhma anga ṭha tur chuan beisei chi a nih tawh loh thu a sawi.