Zanin dar 7-ah ṭantu nei lo Chanmari leh MLS

GIG Motors MPL12-ah zanin dar 7:00 hian Chanmari FC leh MLS FC te an inkhel dawn. MPL season hmasa ber aṭanga tun thlenga la khel Chanmariin ṭantu an nei ṭha ṭhin a, mahse I League khel tura an inpettlin hnuah ṭantu an nei ṭha lo.

An match hnuhnung bera Chanmari midfielder Aron Vanlalrinchhana'n mawi zeta Saikhamakawn lama a khung ṭumah pawh RG Stadium a reh nghal ṭhap. Goal luh hma zawng hian Saikhamakawn ṭantute an au a, Chanmari goal khung laia au chhan tur a awm loh bakah Chanmarians lamin ṭantu an neih miau loh avangin khuavang kal lai ang maiin stadium a reh.

Rochhingpuia hote hian match hnuhnung pahnihah chak hmel an hmuh tawh loh avangin insiamṭhat a ngai a, khelmual chhunga insiamṭhatna tur aiin khelmual pawna insiamṭhatna tur a tam zawk. MLS an hmachhawn hun hi zan a nih dawn avangin Chanmari tan insiamṭhatna remchang a ni dawn a, khelmual pawna lam 'Shabash Chanmari' tia ring taka au rual tham an awm a nih chuan Chhinga hote tan point thum hlawh harsa tur awmin a lang lo.

Chutihrualin MLS FC-in Chanmari hi 3-1 in hneh tawh lo mah se phase 1-a an dinhmun thlirin I League elpha an ni tih a chiang a, Lawngtlai club hian a chhe berah point khat hlawhchhuah an tum dawn. Midfielder K. Lalremmuana leh winger Freddy Lalrinkima te an tlangnel chho a, goal nga khung tawh M. Lalpektluanga te an kawl avangin Chanmari barakhaih thei an ni tlat.