Chelsea tan German champion an u hret

FIFA Club World Cup champion Chelsea-in Nilaini an khan Allianz Arena an tlawh a, German champion Bayern Munich lakah 3-1 in an tlawm. Blues defender Trevoh Chalobah-a'n an lama a tihluh bakah Harry Kane-a'n goal hnih a khung a, London club goal awmchhun hi Cole Palmer-a khung a ni.

Bayern-in chak an phu a, Vincent Kompany-a'n 'home work' a ti ṭha a, Chelsea erawh zir tur an la ngah. Enzo Maresca hote hian September 20, Inrinni zan dar 10:00-ah Old Trafford an tlawh lehnghal dawn a, an khingpui tur Manchester United hi Europe inelna lian leh League Cup-a tlak tawh avanga kar khat tawp inpuahchahna hun nei an ni.

Home work chu

Football-ah hian manager hna a pawimawh a, khingpui turte hmachhawn tura an inpuahchah hmain khinpguite zirchianna a la hmasa. Vincent Kompany chuan, "Season liam ta khan Chelsea inkhel hi match 40 bawr vel zet chu ka en ang. Inzirna tur tam tak a awm a, mahse thil danglam tak an ti lo. An coach hi ka hrechiang em em bawk," tiin an khingpui tur chungchang a sawi lawk.

Chelsea boss Enzo Maresca hian Man City-ah U23 a enkawl tawh a, Pep Guardiola hnuaiah assistant manager hna a thawk tawh bawk. Kompany hi Man City legend a ni thung a, Etihad Stadium-a an awm hun inang lo mah se Belgian manager-in ka hrechiang a ti hi thilmak a ni lo.

Kane leh Palmer

Germany khawpui Munich-ah English player an langsar a, England captain Kane-a goal khung theihzia pholangin a awm a, Palmer-a talent ṭhatzia hmuh tur a awm bawk. Inkhel ṭan chiahah Palmer-a ball fing chu Enzo Fernandez-a'n goal-ah a chantir thei lo.

Minute 20-na lekah Michael Olise-a'n dinglam aṭangin ball ṭha takin a cross a, Trevoh Chalobah-a'n an lamah a tilut. Chelsea an talbuai zui a, minute 27-naah Kane-a'n fing takin Moises Caicedo lakah penalty hlawh chhuakin goal-ah a chantir zui. Chelsea mualpho tur thup nan minute 29-naah Palmer a rawn lang a, counter attack hmanga nawr letin thui tak a khalh hnuah right back Malo Gusto nen wall pass hnuin English midfielder hian goal ṭha bik a khung.

Chelsea-in goal khat la mamawh mah se goal hmaah Bayern an hlauhawm zawk zel. Konrad Laimer-a'n a hna a tlin a, right back ni ringawt loin midfielder a nih telna a rawn lang a, chance a rawn neih bakah chance ṭha a siam. Kane leh Oliser ten chance ṭha bik an hlah hnuah Chelsea tlarhnung an chesual a,minute 63-naah Kane-a'n a khung belh.

Bayern-in chak an phu a, Chelsea keeper Robert Sánchez khel ṭha lo se mualpho thei an ni. Chutihrualin hun tawp hma deuha Palmer-a goal khung chu offside vangin pawm a ni lo a, pawm ngat se chuan inkhel tawp lam boruak a nung lehzual ang.

Engtin zel?

Kompany-a'n home work a ti ṭha tih a lang a, Maresca enkawl Blues lakah an chungnung zawk. Belgian manager hian Bavarians a zawmtirhin iaitu nei mah se Bundesliga nomawi a chawi tawh a, tun season match rukah vawi ruk chakin goal 22 an khung tawh a, Europe club lian an nihzia an pholang leh ta.

Chelsea erawh world champion ni mah se season liam taa Conference League khel an ni a, Champions League boruak a danglam deuh niin a ang. Chutihrualin an player pawimawh Palmer chuan, "Inzir belh tur ringawta Champions League khel kan ni lo a, Bayern lakah elpui tlak kan ni tih kan pholang a, a sang thei ang ber thlen kan tum," tiin a tikimtu nih an tum loh thu a sawi thung.