Los Angeles chakna Son Heung-min

Son Heung-min chuan Major League Soccer (MLS) lamah a vawi khat nan hattrick a siam, nimin zing khan Los Angeles FC chu Real Salt Lake lakah 4-1 in hnehna a chanpui a ni.

South Korean tlangval Son-a hian minute thumna lekah goal hmahruai a khung ṭan a, minute 16-naah hla deuh tak aṭangin an goal hnihna a khung zui bawk a, a team chu dinhmun ṭha takah a dinpui nghal phawt.

Salt Lake lamin goal khat sut ṭhen mah se, hun tawp dawn lamah Son-a bawk hian Denis Bouanga nen ball an inpek hnuah an goal thumna a khung a, a siamsaktu Bouanga hian goal khat dang a khung ve bawk.

Son-a hian Tottenham Hotspur chhuahsanin Los Angeles FC hi a pan a, a vanglai pel ve ṭan deuh tawhin lang mah se goal khung erawh a la thiam reng - Premier League club Spurs tana a hna thawh ang khan a la thawk chhunzawm.

Son Heung-min chuan, "Ka khelh ṭhat leh thiam bik vanga hattrick siam ka ni lo, ka ṭhianten min thlawp ṭha em em a, a hmawr bawktuah ka ṭang mai chauh a ni, mimal thil tih a ni bik lo.

"Kan defender-te khan kan lama lut tur tur vawi tam tak an lo dangchat a, chutiang ni lo se la chuan kan talbuai hle ang. Goal khung chauh a ni lo a, a venhim lam kan tih ṭhat bawk avangin result ṭha pawh kan nei niah ka ngai," tiin a sawi.

Goal khat khungtu Bouanga hian season duhawm a hmang ve mek bawk - St-Etienne aṭanga Los Angeles FC zawmtu hian tun season kal laiah MLS goal 19 a khung tawh, goal khung tam lamah Sam Surridge (21 goals) leh Inter Miami captain Lionel Messi (20) te chauh tluk loh a nei.

Western Conference-ah LAFC hian match 28 an khelh aṭangin point 47 an hmu a, team 15 zingah palina ni mekin, playoff khel turin an dinhmun pawh a ṭha chho ta hle.