Benfica enkawk tur Jose Mourinho

Jose Mourinho chuan team enkawl hna a thawk leh dawn ta - Portuguese manager hian Benfica sawmna chu a pawm a, inremna thu ziak turin a inpeih tawh - nizan kha chuan thuin a ziah fel hman ngei a rinawm.

UEFA Champions League-ah Benfica-in an muala Qarabag lakah 2-0 in hma hruai mah se 3-2 in an inlehthaltir. Thawhlehni zan inkhel result avang hian Benfica-in an manager Bruno Lage an ban nghal a, a thlakna turin Mourinho hi an be nghal a ni.

Benfica hian nikum September tir khan Lage hi an la lut a, Primeira Liga leh Taca de Portugal-ah pahnihna niin Taca da Liga-ah an champion. Champions League leh FIFA Club World Cup-ah last 16 an thleng a, tun season Primeira Liga-ah point 12 hmuh theih aṭangin point 10 an hmu a, palinaah an awm mek.

Lage-a hnuaia Benfica result hi la chhe lo mah se Qarabag an hneh loh avangin an ban. Porutuguese club hian Mourinho chu inremna an neih pui nghal a, ani hi FC Porto aṭanga rawn lar chhuak a ni a, Benfica a enkawl chuan Portuguese league pawh a nung sawt ang.

Kum 62 mi Mourinho chuan, "Benfica hian an hnena kal turin ka duh leh duh loh min zawt a, tuin nge Benfica hnar thei ang? Kei chuan hetiang sawmna ṭha leh duhawm hi ka hnar thei lo a ni," tiin a sawi.

Mourinho-a'n team enkawl hna a bul ṭanna chu Benfica hi a ni a, mahse club President nen an inngeih loh avangin match 11 bak a kaihruai hman lo. Club tenau zawk União de Leiria enkawl leh zawkin, chumi hnuah Porto zawmin hming a chher a, 2003-04 season phei kha chuan Champions League-ah a champion pui hial.

Benfica hian Champions League-ah Chelsea, Newcastle, Leverkusen, Ajax, Napoli, Juventus leh Real Madrid te an la hmachhawn dawn a, hmabak erawh a harsa dawn, tawnhriat nei ṭha Mourinho tan chona phurawm leh hautak a ni ang.

Kum 2004 khan Portugal ram chhuahsanin team lian dang a enkawl ṭan a, Chelsea, Inter Milan, Real Madrid, Manchester United, Tottenham Hotspur, AS Roma leh Fenerbahce te a kaihruai tawh a, hlawhtlinna pawh ṭhahnem tak a chang tawh bawk.

Nomawi tam tak chawi mah se tun hnaiah erawh ropui takin a che hleithei bik lo, a team enkawl hnuhnung ten an ban ta zel. Tunah chuan, a hriatchian hmunah a kir leh dawn a ni a, khelmual chhung mai bakah a pawn lamah a ngaihnawm tel leh ngei ang.