Inter chakna Marcus Thuram

Marcus Thuram-a goal hnih hmangin Inter Milan chuan Ajax chu 2-0 in an hneh - Italian club hian Champions League season thar bul an ṭanna hmasa point thum an hlawh chhuak nghal a ni.

French forward Thuram hian chawlhlawk hma hretin Hakan Calhanoglu-a corner pet chu a tauh lut a, second half tir lamah pawh corner aṭang bawkin an goal hnihna a tauh lut a, khualmualah hnehna hlado an chham.

Kum 28 mi Thuram hian season bul a ṭan fuh hle, inelna hrang hrangah match li a khelh aṭangin goal nga a khung tling der tawh. Season hmasa UCL final-a Paris Saint Germain laka an mualphona kha hliah khuh tumin thapui an thawh chho mek.

Simone Inzaghi thlaktu Cristian Chivu hoin Serie A lamah bul ṭan fuh tawk lo mah se, European football inelna sanga bul an ṭan dan erawh a duhawm hle, goal hnih an khung bakah anmahni goal an venghim tluan.

Inter Milan coach Cristian Chivu chuan, "Rim taka kan beihna rah chu tunah a takin kan hmu ta, khualmualah khan team puitling kan nihzia chu a takin kan lantir niah ka ngai. Ajax kha an hlauhawm em em a, chutiang karah chuan min beihna kawng hrang hrang kha kan veng tluan thei, thil lawmawm tak a ni.

"Player kan rem leh siksawi dan lam ai chuan, khelmual chhunga lutten an hna ṭheuh tlin taka an thawk khan min tilawm. Rilru leh taksa a inpeih tih kan hmu a, tuna kan khelh ang hian Serie A lamah pawh kan khelh chhunzawm ka beisei," tiin a sawi.

Inter Milan hian kar tawpah Serie A khel turin Sassuolo an mikhual zui leh dawn a, league lama an result ṭha tawk lo siamṭhat theihna tur remchang a nih a rinawm.