Messi tan contract thar a hnai?

Lionel Messi-a'n Inter Miami tana contract a neih lai hi tun season tawp ruala zo mai tawh tur a ni a, inremna thar la nei chiah loh mah se khawthlang chanchinbute chuan contract thar a ziak dawn niin an sawi.

Messi hian Europe khawmualpuia hlawhtlinna awm thei zawng zawng a chan zawh hnuah Major League Soccer a pan a, MLS-ah pawh player hmuhnawm bik niin, mipui hip ber a la ni phak.

Mi tam tak chuan Messi hian World Cup 2026 khel turin intuai hriam a duh a, chuvangin Europe lamah a kir leh mai thei niin an sawi. Mahse, kum 38 mi Messi-a'n khaw dang a hawi tawh rih lo zawk niin a lang.

Argentina captain tan chuan Inter Miami tana khelh chhunzawm hi a fuh zawk a rinawm. World Cup 2026 thlengtu hi United States, Mexico leh Canada te an ni dawn, hei vang hian inelna lian atan a lo inbengbel lawk sa tihna a ni thei zawk.

Ballon d’Or vawi riat dawng tawhtu Messi hian Inter Miami tan inelna hrang hrangah match 62 a khelh aṭangin goal 54 a khungsak leh tawh a, a vanglai pel deuh tawh mah se goal khung thei bik a nihna erawh a la chuai chuang lo.