Quarterfinal-ah Sindhu a lut

Badminton inelna neih mek China Masters tournament-ah PV Sindhu chuan quarterfinal a invaw kai a, mipa doubles huangah Satwiksairaj Rankireddy leh Chirag Shetty te chuan last 16 an paltlang ve bawk.

Olympic medal vawi hnih la tawh Sindhu hian minute 41 chhungin Pornpawee Chochuwong chu 21-15, 21-15 in a hneh, a match lehpekah chuan An Se Young a hmachhawn ang.

Tun hmain Sindhu leh An Se Young te hi vawi sarih an inhmchhawn tawh, heng zinga paruk ngawtah hian An Se Young-i a chak - South Korean nula hian straight game hmang zelin hnehna a chang, Sindhu tan fimkhur a ngai dawn hle tihna a ni.

Sindhu chuan, "Season hmasa leh kumin chu ka khel ṭha tawk lo tih ka hria, tunah erawh 100%-in ka inpeih leh ta tih a takin ka lantir thei a, tun tournament ka khelh danah hian lawmna tur tam tak a awm," tiin a sawi.

Satwik leh Chirag te ṭangdun chuan Chinese Taipei player Wang Chi-lin leh Chiu Hsiang-chieh te inkawp chu 21-13, 21-12 in an hneh a, an hmabakah Ren Xiang Yu leh Xie Haonan te an awm ve leh thung ang.