Liverpool & Atletico buaina an chhui dawn

Atletico Madrid chuan Liverpool nen an inkhelh ṭuma, inkhel tawp lama buaina chungchang chu an chhui chiang dawn - manager Diego Simeone-a backroom staff zinga mi pakhat chuan Liverpool fans lam hawiin chil a lo chhak a ni!

Nilaini zan khan Champions League inkhelah Liverpool-in Atletico hi an mikhual a, Virgil van Dijk chuan hun pek belhah Reds tan chakna goal a khung - VVD-a goal khung hnuah hian Simeone chu Reds fan-te nen an intibuai a, kal sawntir ngai khawpin a khawsa.

Simeone hi red card pek zui a ni a, inkhelh zawhah a tih loh tawp tur a tih thu sawiin, "Mahse, minute 90 chhung ṭawngkam chhe tinrenga beih ka ni," tiin a sawi zui - hetiang taka an buai lai hian a staff zinga pakhat chuan fans lam hawiin chil a lo chhak niin a lang.

Hei hi Atletico Madrid chuan an chhui chiang dawn a, European football-a thuneitu sang ber UEFA pawhin official report zawng zawng a bihchian hunah, a ṭul angin hma an la dawn a ni.

Liverpool chuan he buaina chhuichianna kawnga mamawh awm ang ang chu UEFA hnenah a theh lut dawn nia sawi a ni a, Atletico leh Liverpool inkhel chanchin a la tawp mai dawn lo.

Hetihlai hian Reds hian vawiin tlai dar 5:00-ah Premier League match an khel lehnghal dawn a, Merseyside derby-ah Everton an mikhual dawn - league match liah vawi li an chak tawh a, match nga a zawna chak an tum ang.