UCL goal 50 khungtu Haaland

Erling Haaland-a'n Champions League bikah goal 50 a khung tling der, hetiang zat goal khung tur hian match 49 chauh a la khel zui! Haaland hian Manchester City chu Napoli lakah 2-0 in hnehna a chanpui.

Ningani zan Etihad Stadium-a inkhelah, mikhual defender Giovanni Di Lorenzo chu minute 21-na lekah hnawhchhuah a ni. Kevin de Bruyne hoa khel Naples tan tih theih a tam tawh lo.

Italian club hi chawlhlawk hma chu an inveng tluan thei, mahse second half-ah Haaland hian Phil Foden siamsak a khung bakah Jeremy Doku chuan a khung belh a, nuamsa takin point thum an hlawh chhuak.

UCL goal 50 khung turin Haaland hian player dang zawng zawng aiin hun a mamawh tlem ber a, European football inelna sanga goal khung tam ber Cristiano Ronaldo (140 goals) chu la hlat hle mah se an khaikhin der tawh.

Man City manager Pep Guardiola chuan, "Eng tianga rei nge hun a mamawh ang tih chu ka sawi thei lo, tuna anga a khelh zel a, hmasawn zawnga a kal a nih phawt chuan goal khung tam ber a ni thei ang," a ti.

Norway international striker Haaland hian Arsenal lakah goal khung chhunzawm a tum dawn a, defender ṭha a hmachhawn dawn avangin a tan pawh chona lian leh hautak a tling ngei ang.