Saikhamakawn an hlim, Kanan an ngui

GIG Motors MPL12 zan inkhel hmasa berah Saikhamakawnin 2-0 in SYS FC an hneh a, inkhelh banah SKK ṭantute, "Saikhamakawn i te ber tawp lo e," tiin an zai rual. Hrem vangin Lalsangzuala Hmarin a naute hote thei lo mah se Ningani zan inkhelah hian Suanngaihmuana leh Kiran Chhetri te goal hmangin hnehna an chang. Nimin tlai khan player 10-a khel chungin Aizawl FC-in Kanan FC 1-0 in an hneh a, goal awmchhun khungtu Zomuansanga a ni.

Semifinal khel thei zingah Saikhamakawn an awm a, nizan inkhela MLS-in Chanmari an hneh erawh chuan Lalsangzuala Hmar hote hi panganaah an awm leh thung ang. SKK-in September 23, Thawhlehni zanah phase 1-a an hneh loh MLS FC an hmachhawn dawn a, entu an ṭhahnem leh khawp ang.

Aizawl FC-in team ṭha bik an nihzia lantirin minute 12-na lekah Zomuana'n a khung nghal a, Khawbel tlangval hian hrem vangin match hnuhnung ber khel lo mah se goal a rawn khung lehnghal a, goal kua khung tlingin Amuana (goal 7) aiin goal hnihin a khung tam zawk.

I League club winger Laltlanzova'n ṭul lo taka Kanan right back Lalrochama a pet avangin darkar khatna chhoah a phu ang ngeia hnawhchhuah a ni a, hun tawp lamah an buai phah hle. Kananin hun tawp lamah chance an ngah a, Aizawl FC keeper John Lalruatfela'n tihsual a neih bawk avangin Chawngthansanga hoten siphurh an sut teuh hle. Offside vangin Kanan goal an pawm lo a, I League club an him hram.