Dr T Ao Football Semifinal Tlai dar 2:00-ah Nagaland Vs Mizoram

NorthEast state-te football hmanga inelna Dr T Ao Football semifinal chu vawiin tlai dar 2:00 hian Indira Gandhi Stadium, Kohima-ah khelh ṭan a ni dawn a, inelna thlengtu Nagaland leh Mizoram an inhmachhawn dawn. Tlai dar 4:30-ah Sikkim leh Arunachal Pradesh ten semifinal hnuhnung zawk an khel ang a, pathumna zawnna leh final hi January 28, Thawhlehniah khelh nghal tur a ni ang.

Mizoram hian group match hnuhnung berah Sikkim 2-1 a an hneh loh avangin group B-ah pahnihna an ni a, final thleng turin group A-a khingpui zawng zawng hnehtu Nagaland an hneh a ngai dawn. Inelna thlengtu Nagaland hian goal 20 khung tawhin goal thum chiah an la chhuah a, result aṭanga thlir chuan team ṭha ber an ni.

Dr T Ao Football-ah hi kum 2009 aṭang khan neih ṭan a ni a, vawi riat khelh ni tawhin Manipur vawi ruk an champion. NorthEast football power house tiha sawi ṭhin Manipur hian match hmasa berah Tripura 11-0 in hneh mah se Arunachal Pradesh nen 1-1 in an inhnehtawk a, match tawp berah Nagaland 3-2 a an hneh loh avangin an tla.

Nikum Santosh Trophy qualifier-a Mizoram hnehtu Meghalaya pawhin beisei an pha lo. Meghalaya hian an match hmasa berah Mizoram lakah 6-0 zetin an tlawm a, Sikkim nen 1-1 a an inhnehtawk hnuah Assam 8-1 zetin sawp mah se an tawpna chu group stage a ni.

Mizoramin an match hmasa berah Meghalaya 6-0 in an sawp a, Assam 4-0 a an hneh bawk avangin group A hmahruaitu ni ngeia tura ngaih an ni a. Khawtual mipui final duhthusam chu Nagaland leh Mizoram inkhel a ni a, amaherawhchu Mizoramin beisei an phak loh avangin a thleng dawn lo.

Inrinni zan inkhelah Sikkim-in Sonam Tshering Bhutia (17') leh Dawa Sherpa (20') te goal hmangin hma an hruai a, goal hnihna hi keeper RS Lallawmzuala tihsual vanga lut a ni. Mizoramin PC Laldinpuia hmangin first half injury time-ah siphurh an sut a, second half-ah nawr tawm viau mah se goal dang an khung belh thei lo. 

Sikkim-in chak tumin tlarhnungah player an hnawh khawm a, hun khawhral nan an na der nasa a, an tumah erawh an hlawhtling. Minute 90 chhungin Mizoramin team ṭha zawk an ni tih lantir mah se chak lo thei an nihzia nemnghetin a awm.

Dr T Ao Football hi YouTube channel 'Nagaland & North East Cornerstone TV' ah tihchhuah ṭhin a, Mizoram leh Nagaland inkhel en a châkawm hle. Inelna thlengtu Nagaland hian kum 2009 hnuah final an la thleng leh lo a, Mizoram erawh vawi li final lut tawhin vawi hnih champion tawh an ni thung.

Nagaland player Rhitsho Mero leh captain Khwetelhi Thopi ten goal sarih leh goal ruk an khung tawh a, Mizoram tan ven uluk a ṭul ang. Coach Lalremtluanga leh manager T. Vanlalhluna kaihhruai Mizoram tana a harsa tur erawh Nagaland hi an muala khel tur an ni a, ṭawiawmtu an nei ṭha dawn.

Mizoram manager T. Vanlalhluna chuan, "Sikkim lakah chak lo mah ila team ṭha zawkah kan inngai a, goal kan khung theih loh kan tuar. Chutihrualin goal hnih kan chhuah hmasak avangin a kaw tawpah Sikkim an ṭang a, goal khung a har tawh a ni. Chu bakah chuan kan player ṭha ṭhenkhat yellow card hmu tawhte kan awltir a, Nagaland nen chuan kan ṭhat dan berin kan khel thei tawh ang," tiin Vanglaini a hrilh.

Dr TAo Football-ah hian champion team-in nuai 10, pahnihnain nuai ruk, pathumnain nuai hnih leh palinain nuai khat an dawng dawn. Mizoram hian hnehna an chang a nih chuan nuai ruk a hmin nghal dawn a, group stage an khelh dan thlirin Mizoram leh Nagaland inkhela chak zawk hi champion tura ngaih an ni.